කොළඹ පුද්ගලික රෝහලකදී පසුගිය 06 වනදා අභාවප්‍රාප්ත වූ කහවත්තේ ගුරුගේ මැණික් අධිපති ජිනදාස ගුරුගේ මහතාගේ අවමගුල් උත්සවය ඊයේ (06) රත්නපුර – කහවත්තේදී පැවැත්වුණා.
පවත්නා වසංගත තත්ත්වය මත කිසිදු ආකාරයක අවමගුල් උත්සවයක් පැවැත්වීමට තහනම් කර තිබෙන තත්ත්වයකදී හා රට වසා දමා ඇති තත්ත්වයකදී දහසකට ආසන්න පිරිසකගේ සහභාගීත්වයෙන් මෙම අවමගුල් උත්සවය පැවැත්වීම විශේෂත්වයක්.
ජිනදාස ගුරුගේ මහතාගේ පාංශකූල පිංකම සඳහා පමණක් භික්ෂූන්වහන්සේලා 50 කට වැඩි පිරිසක් සහභාගීවී සිටි අතර ශබ්ද විකාශන යන්ත්‍ර භාවිතා කරමින් කතා පැවැත්වීමටද පැමිණ සිටි ප්‍රභූ පිරිසට මෙහිදී අවස්ථාව සලසා තිබුණා.
මෙම අවමගුල් උත්සවයට හිටපු සෞඛ්‍ය අමාත්‍යවරිය මෙන්ම වර්තමාන ප්‍රවාහන ඇමතිනි පවිත්‍රා වන්නිආරච්චි මහත්මිය හා සමගි ජනබලවේගය පක්ෂයේ පාර්ලිමේන්තු මන්ත්‍රී තලතා අතුකෝරළ මහත්මියද සහභාගීවී සිටින අයුරු දක්නට ලැබුණා.
දැවැන්ත උත්සවයක් ලෙස සංවිධානය කර තිබූ මෙම අවමගුල් උත්සවයට ස්ථාන කිහිපයකදී තොරන් පවා ඉදිකර තිබෙන අයුරු දක්නට ලැබුණු බව අප වාර්තාකරු සඳහන් කළා.
එමෙන්ම හෙලිකොප්ටරයක් යොදාගෙන ඉන් මල් වරුසා වැස්සවීමටද සංවිධායකයින් කටයුතු කර තිබුණා.
කෙසේ වෙතත් සාමාන්‍ය පුද්ගලයෙකුට තමන්ගේ පවුලේ අය හෝ සහභාගීකරගෙන අවමගුල් උත්සවයක් පැවැත්වීමට අවසර නොලැබෙන කාලයක සමාජයේ ඇති හැකි පුද්ගලයන්ට ක්‍රියාත්මක වන ‘එක රටක් නීති දෙකක්’ සංකල්පය පුදුම සහගත නොවන බව සාමාන්‍ය ජනතාවට වැටෙහනු ඇති.
