පසුගිය මාසයේ ඉල්ලා අස්වූ ස්පාඤ්ඤයේ රදගුරු සේවියර් නොවෙල්ගෙ ඉල්ලා අස්වීමට විස්තර කළ නොහැකි පෞද්ගලික කරුණු රාශියක් හේතුවී ඇතැයි රෝමානු කතෝලික පල්ලිය ප්‍රකාශ කර තිබේ.
ඔහු සාතන් ස්වරූපයෙන් යුත් කාමුක ප්‍රබන්ධ ලියන කතුවරියක සමඟ ආදරයෙන් වෙළී ඇතැයි යන්න මේ වන විට ස්පාඤ්ඤ මාධ්‍ය තුළ දැඩි ලෙස කතා බහට ලක්ව ඇත.
2010 වසරේ දී 41 හැවිරිදි නොවෙල් කැටලෝනියාවේ ඊසානදිග කලාපයේ සොල්සෝනා හි ලාබාලතම රදගුරු බවට පත් විය.
ස්පාඤ්ඤයේ කතෝලික පල්ලියේ නැගී එන තරුවක් ලෙස සැලකෙන ඔහු වතිකානුවේ අනුමැතිය ඇතිව පසුගිය මාසයේ ඉල්ලා අස්වීමට ගත් තීරණය සියල්ලන් මවිත කරනු ලැබීය.
ඔහු වතිකානුවේ නිලධාරින් මෙන්ම පාප් වහන්සේ ද කිහිප වරක් මුණගැසී ඇති බව පැවසේ.
සමලිංගිකත්වය පිළිබඳ දැඩි අදහස් හා කැටලෝනියානු නිදහස සඳහා විවෘතව සහයෝගය දැක්වීම හේතුවෙන් ඔහුගේ අදහස් නිරන්තරයෙන් මතභේදයට තුඩු දුන්නේය.
මනෝවිද්‍යාඥවරියක් සහ ශෘංගාරාත්මක නවකතාකාරිනියක් වන සිල්වියා කබලෝල් සමඟ ඔහුගේ සම්බන්ධය සමාජය ඉමහත් කම්පනයට පත් කර ඇතැයි සඳහන් වේ.
ඒ අතර හිටපු රදගුරුතුමන් මේ වන විට කෘෂි විද්‍යාඥයෙකු ලෙස බාර්සිලෝනා ප්‍රදේශයේ රැකියාවක් සොයන බව ද ඇතැම් මාධ්‍ය වාර්තා කර තිබේ.
