ගුරු වැටුප් විෂමතා සම්බන්ධයෙන් ගුරු – විදුහල්පති වෘත්තීය සමිති එක්ව සිදුකරන ලද උද්ඝෝෂණ හා විරෝධතා සම්බන්ධයෙන් අපරාධ පරීක්ෂණ දෙපාර්තමේන්තුව මගින් විමර්ශනයක් සිදුකරන බව හොරණ පොලීසිය පවසනවා.
ඒ අනුව පසුගිය ජුනි මස 25 වනදා සහ අගෝස්තු මස 05 වනදා පැවැත්වූ ගුරු උද්ඝෝෂණයට සහභාගීවූ ගුරුවරුන්ගේ විස්තර හොරණ පොලීසිය විසින් එක්රැස් කරන බවට ලිපියක් නිකුත් කර තිබෙනවා.
හොරණ, ඉංගිරිය, මදුරාවල, මිල්ලනිය ප්‍රාදේශීය ලේකම් කාර්යාල වෙත ලිපියක් යොමුකරමින් හොරණ මූලස්ථාන ප්‍රධාන පොලිස් පරීක්ෂකවරයා ඉල්ලා ඇත්තේ අදාළ දිනයන්හී ගුරු – විදුහල්පති උද්ඝෝෂණයට සහභාගීවූ ගුරුවරුන් පදිංචිව සිටින පොලිස් වසම, සංවිධානය කරන ලද පුද්ගලයන්ගේ නම් හා ලිපිනයන්, සහභාගීවී ඇති පුද්ගලයින් සංඛ්‍යාව, එම දිනයන්හී කොවිඩ් 19 ආසාදිතව මියගොස් ඇති හා ආසාදිත බවට හදුනාගත් විදුහල්පතිවරුන්ගේ සහ ගුරුවරුන්ගේ නම් යනාදිය කඩිනමින් ලබාදෙන ලෙසයි.
මෙම විමර්ශනය කඩිනම් විමර්ශන අවශ්‍යතාවයක් බැවින් මේ සම්බන්ධයෙන් දක්වන සහයෝගය අගය කරන බවද හොරණ මූලස්ථාන ප්‍රධාන පොලිස් පරීක්ෂකවරයා සදහන් කර තිබෙනවා.
