‘බිට්කොයින්’ නීත්‍යානුකූල මුදල් ඒකකයක් ලෙස හඳුන්වා දීමෙන් කෝපයට පත් එල්සැල්වදෝරයේ ජනතාව දහස් ගණනක් වීදි බැස ඇතැයි වාර්තා වනවා.
ජනාධිපති නයිබ් බුකලේ පවස ඇත්තේ විදේශයන්හි සේවය කරන සැල්වදෝරන්වරුන්ට මුදල් ආපසු රටවෙත එවීමට මෙම අදිසි මුදල් ඒකකය ව්‍යවහාරයේ පැවතීම උපකාරී වනු ඇති බවයි.
නමුත් දුප්පත් ලතින් ඇමරිකානු රටක් වන එල්සැල්වදෝරය මෙමඟින් තවත් අස්ථාවරත්වයට පත්වනු ඇති බවත් මෙමගින් උද්ධමනයක් ඇති වනු බවත් විරෝධතාකරුවන් පවසා තිබෙනවා.
ඇතැම් තැනක විරෝධතාකරුවන් නවතම බිට්කොයින් යන්ත්‍රයකට ගිනි තැබූ අතර තවත් සමහරු “බුකලේ ඒකාධිපති” යනුවෙන් සඳහන් පුවරු ප්‍රදර්ශනය කරමින් විරෝධතා පැවැත්වූ බව සඳහන් වනවා.
පසුගිය සතියේ එල් සැල්වදෝරය මෙම අදිසි මුදල් ඒකකය නීත්‍යානුකූල කළ පළමු රට බවට පත්විය.
‘බිට්කොයින්’ යනු ව්‍යවහාරයේ තිබෙන මුදල් වෙනුවට භාවිතයට ආ ඩිජිටල් මුදල් ඒකකයකි.
එහි අරමුණ වන්නේ සියලු දෙනාට නිදහසේ භාවිතා කළ හැකි ඉලෙක්ට්‍රොනික මුදල් ඒකකයක් භාවිතයට ගැනීමයි.
මෙහි ඇති පහසුව නම් එක් රටක සිට තවත් රටකට මුදල් යැවීමේදී වන ප්‍රමාදය මඟහැර ඉතාමත් අඩුම කාලයකින් මුදල් හුවමාරුවට ඇති හැකියාවයි.
කෙසේ වෙතත් එය භෞතිකව නෝට්ටු හෝ කාසි ලෙස නොව අන්තර්ජාලය හරහා පවතින දෙයක් බැවින් මුදල් වංචාකිරීම් සහ හොරකම් කිරීම් සිදුවිය හැකි බවට බොහෝ දෙනෙක් චෝදනා කරනවා.
