ඉන්දුනීසියාවේ ඉහළ පෙළේ දේශපාලන සහ ආරක්ෂක සබදතා ජාලවලට අනවසර ප්‍රවේශයක් සිදුව ඇති බව අනාවරණය වී තිබේ.
විදෙස් වාර්තා සදහන් කළේ එරට මූලික බුද්ධි අංශය, ඇමතිවරුන් සහ ආයතන 10 ක පමණ ජාලගත පරිගණක පද්ධති වෙත මෙම අනවසර ප්‍රවේශය සිදුව ඇති බවයි.
ඒ හරහා අතිශය වැදගත් සහ සංවේදී දත්ත රැසක් පැහැරගෙන ඇති බවට විශ්වාස කෙරේ.
එරට මාධ්‍ය වාර්තා කර ඇත්තේ, චීනය පදනම් කරගත් පරිගණක ඔත්තුකරුවන් පිරිසක් මෙම ක්‍රියාව සිදුකර ඇති බවටයි.
මුහුදු සීමා ගැටලු හේතුවෙන් චීනය සහ ඉන්දුනීසියාව අතර සබදතා දිගු කලක පටන් අර්බුදයට ලක්ව තිබිණ.
එම සබදතා යථා තත්වයට පත්වෙමින් තිබියදී මෙම ක්‍රියාව සිදුවීම හේතුවෙන් දෙරට අතර සබදතා යළි ගැටලු සහගත වනු ඇති බවට වාර්තා පළවී ඇත.
