එක්සත් ජාතික පක්ෂයේ පොළොන්නරුව දිස්ත්රික් හිටපු පාර්ලිමේන්තු මන්ත්රීවරයෙකු වන සිඩ්නි ජයරත්න මහතා ඇතුළු පිරිසක් සෝමාවතිය ජාතික වනෝද්යානයට ඇතුළු වී වාඩි ගසා මසුන් අල්ලමින් සිටියදී පෙරේදා (18) අත්අඩංගුවට ගෙන තිබෙනවා.
පොළොන්නරුව වනජීවී වැටලීම් ඒකකය පවසන්නේ අදාළ වැටලීමේදී සිඩ්නි ජයරත්න මහතා ඇතුළු තවත් පුද්ගලයින් 15 දෙනෙක් වනෝද්යානයේ මසුන් අල්ලමින් සිටි බවයි.
අත්අඩංගුවට ගත සැකකරුවන් ළඟ තිබී යතුරු පැදි 8 ක්, මාළු දැල්, හට්ටි, මුට්ටි, ටෙන්ට්, තියුණු ආයුධ ඇතුළු උපකරණ කිහිපයක්ද වනජීවි නිලධාරීන් භාරයට ගෙන තිබෙනවා.
මෙම සැකකරුවන් අනවසරයෙන් සෝමාවතිය වනෝද්යානයට ඇතුළුවී ඇත්තේ මාළු ඇල්ලීමට අමතරව, සතුන් දඩයම් කිරීමට, නිදන් සෙවීමට හෝ වෙනත් නීතිවිරෝධී කටයුත්තකටදැයි යන්න පිළිබදව වැඩිදුර විමර්ශන සිදුකරන බව පොළොන්නරුව අඩවි සහකාර එස්.ඒ.වික්රමරත්න මහතා පවසනවා.
සෝමාවතිය වනෝද්යානයට නීතිවිරෝධීව ඇතුළුවීම, වාඩි තැනීම, ගිනි පත්තුකිරීම, ගිනි රැගෙනයාම, මාර්ගයක් භාවිතා කිරීම ඇතුළු චෝදනා කිහිපයක් යටතේ මෙම පිරිස හිඟුරක්ගොඩ අධිකරණයට ඉදිරිපත් කිරීමට නියමිතයි.