ඉල්ලීම් කිහිපයක් මුල්කරගනිමින් සෞඛ්‍ය ක්ෂේත්‍රයේ වෘත්තීය සමිති 44ක් අද (27) උදෑසන 7 සිට සේවයෙන් ඉවත්වීමේ වෘත්තීය ක්‍රියාමාර්ගයක් ආරම්භ කළා.
සෞඛ්‍ය වෘත්තිය සමිති එකමුතුව සදහන් කළේ රුපියල් 7,500ක කොවිඩ් සහාන දීමනාව ලබාදීම, කොවිඩ් විශේෂ නිවාඩු කප්පාදුවකින් තොරව ලබාදීම, අතිකාල නිවාඩු දින ගෙවීම් සීමාවන් ඉවත් කිරීම, සියලුම සේවාවන්වල පුරප්පාඩු පිරවීම, සෞඛ්‍ය සේවාව සංවෘත සේවාවක් කිරීම සහ මාණ්ඩලික සේවා තත්ත්වයට අදාළ චක්‍රලේඛ වහා නිකුත් කිරීම යනාදී ඉල්ලීම් හේතුවෙන් මෙම වර්ජනය ක්‍රියාත්මක බවයි
වර්ජනය හේතුවෙන් කොළඹ ජාතික රෝහල, දකුණු කොළඹ ශික්ෂණ රෝහල, උතුරු කොළඹ ශික්ෂණ රෝහල, ජාතික අක්ෂි රෝහල සහ මහනුවර ජාතික රෝහල ඇතුළු දිවයිනේ සියලු රෝහල්වල සේවා අඩාල වුණා.
කෙසේ වෙතත් මාතෘ හා ළමා රෝහල් සහ මහරගම අපේක්ෂා රෝහල වැනි විශේෂිත රෝහල්වල මෙම වර්ජනය ක්‍රියාත්මක වූයේ නැහැ.
කොවිඩ් රෝහල් සහ ප්‍රතිකාර මධ්‍යස්ථානවල වර්ජනය ක්‍රියාත්මක නොකරන බව පැවසුවත් කොවිඩ් රෝගීන් සඳහාම වෙන්වූ හෝමාගම මූලික රෝහලේ අද වර්ජනය ක්‍රියාත්මක වුණා.
මේ හේතුවෙන් විශේෂ අවශ්‍යතා සහිත දරුවන් සඳහා වූ එන්නත්කරණ වැඩසටහනද අද පස්වරු 1 දක්වා තාවකාලිකව නතර කිරීමට සිදුවී ඇති බවයි වාර්තා වන්නේ.
