නාවලපිටිය, ජයතිලක ක්‍රිඩාංගණයේ ඉදිවන ඇවිදින මංතිරුවක් අසල අද (12) ගුටිබැට හුවමාරුවක් සිදුව තිබෙනවා.
ඒ එම මංතිරු සම්බන්ධයෙන් සොයාබැලීමට එම ස්ථානයට පැමිණි නාගරික මන්ත්‍රීවරුන් අතරයි.
නාවලපිටිය නගර සභාවේ හිටපු සභාපති, ජාතික සමගි ජන බලවේගයේ නාවලපිටිය ආසන සංවිධායක සසංක සම්පත් සංජිව මහතා, නාවලපිටිය නගර සභාවේ විපක්ෂයේ මන්ත්‍රිවරුන් දෙදෙනෙකු සහ ආධාරකරුවන් පිරිසක් ක්‍රිඩාංගණයේ පිවිසුම වෙත අද දින පැමිණ තිබූ අතර එම අවස්ථාවේ ක්‍රිඩාංගණයේ ප්‍රධාන ගේට්ටුව නගර සභාව විසින් වසාදමා තිබූ බවයි වාර්තා වන්නේ.
එම පිරිස ක්‍රිඩාංගණය අසල රැඳී සිටියදී නගර සභාවේ සභාපති අමල් ප්‍රියංකර මහතා සහ ආණ්ඩු පක්ෂයේ නාගරික මන්ත්‍රීවරුන් පිරිසක් සහ ආධාරකරුවන් පිරිසක් ද එම ස්ථානයට පැමිණ ඇති අතර එහිදී නාවලපිටිය නගර සභාවේ වත්මන් සභාපතිවරයා සහ විපක්ෂ පිරිස අතර ඇති වූ උණුසුම් වචන හුවමාරුවකින් අනතුරුව දෙපාර්ශවය අතර ගුටිබැට හුවමාරුවක් සිදුව ඇත.
ගැටුමෙන් සමගි ජන බලවේගයේ ආධාරකරුවන් තිදෙනෙකු නාවලපිටිය දිස්ත්‍රික් මහරෝහල වෙත ඇතුළත් කර ඇති අතර එම සිද්ධිය සම්බන්ධයෙන් නාවලපිටිය පොලීසිය වැඩිදුරට පරික්ෂණ පවත්වයි.
