සෞඛ්‍ය අමාත්‍යංශය විසින් නිකුත් කළ නව සෞඛ්‍ය මාර්ගෝපදේශ අද (16) දින සිට බලපැවැත්වෙනවා.
ඊට අනුව, විවාහ මංගල උත්සව පැවැත්වීමේදී ශාලා තුලට ඇතුලත් කර ගත හැක්කේ එම ශාලාවේ සමස්ත ධාරිතාවෙන් 25%ක පුද්ගලයින් සංඛ්‍යාවකට පමණයි.
කෙසේ නමුත් එහි උපරිමය පුද්ගලයින් 50කට සීමා වියයුතු බවයි එහි දැක්වෙන්නේ.
එමෙන්ම, සෞඛ්‍ය අංශ විසින් එළිමහන් මංගල උත්සව දිරි ගන්වන අතර, ඒ සඳහා පුද්ගලයින් 75 දෙනෙකුට සහභාගී වීමට ඉඩ ලබාදී තිබෙනවා.
කොරෝනා නොවන අවමංගල්‍ය උත්සව සඳහා ඕනෑම වේලාවක සිටිය හැක්කේ උපරිම පුද්ගලයින් 20 දෙනෙකු පමණයි. එමෙන්ම, මළ සිරුර රෝහලෙන් මුදාහැරීමෙන් අනතුරුව පැය 24ක් තුළ අවසන් කටයුතු සිදු කිරීම අනිවාර්‍ය වනවා.
මීට අමතරව, සිනමා ශාලා සියයට 25ක ආසන ධාරිතාවයකින් යුක්තව විවෘත කිරීමට අවසර ලබා දී ඇති අතර, එය ක්‍රියාත්මක වන්නේ ලබන 21 වැනි දා සිටයි.
ව්‍යායාම ශාලා 30%ක ධාරිතාවකින් විවෘත කල හැකි අතර සිටිය හැකි උපරිම පුද්ගලයන් සංඛ්‍යාව 10ක්.
පන්සල් , පල්ලි, කෝවිල් වැනි පූජනීය ස්ථානවල සාමූහික ක්‍රියාකාරකම් හෝ රැස්වීම් පැවැත්වීමට අවසර නොමැති අතර උපකාරක පන්ති පැවැත්වීමටද තවදුරටත් අවසර නැහැ.
