විල්පත්තු රක්ෂිත වනාන්තර කලාපය ආශ්රිතව පිහිටි කල්ලාරු රක්ෂිත කැළෑ ප්රදේශය හෙළිකොට අනවසර ඉදිකිරීම් සිදු කළේ යැයි චෝදනා කරමින් ගොනු කෙරුණු නඩුවකදී අභියාචනාධිකරණය විසින් රිෂාඩ් බදියුදීන් මහතාට එරෙහිව නිකුත් කර තිබෙන නියෝගයක් බලරහිත කරන ලෙස ඉල්ලා පාර්ලිමේන්තු මන්ත්රී රිෂාඩ් බදියුදීන් මහතා පෙත්සමක් ගොනුකර තිබෙනවා.
එම පෙත්සම මුර්දු ප්රනාන්දු සහ එස්. තුරෙයිරාජා යන ශ්රේෂ්ඨාධිකරණ විනිසුරු මඩුල්ල ඉදිරියේ අද (22) කැඳවනු ලැබූවා.
එහිදී ශ්රේෂ්ඨාධිකරණය නියම කළේ පාර්ලිමේන්තු මන්ත්රී රිෂාඩ් බදියුදීන් මහතා විසින් ඉදිරිපත් කළ අභියාචනා පෙත්සම පෙබරවාරි මස 03 වනදා කැඳවන ලෙසයි.
විල්පත්තු රක්ෂිත වනාන්තර ආශ්රිතව පිහිටි කල්ලාරු හා මරිච්චුකට්ටි වනාන්තර එළිපෙහෙළි කොට අනවසර ඉදිකිරීම් ගොඩනැගීමට එරෙහිව පරිසර යුක්ති කේන්ද්රය විසින් 2015 වසරේ එවක අමාත්යවරයාව සිටි රිෂාඩ් බදියුදීන් ඇතුළු පිරිසකට එරෙහිව අභියාචනාධිකරණය හමුවේ පෙත්සමක් ගොනු කළා.
එම පෙත්සම විභාග කළ අභියාචනාධිකරණය අදාළ වනාන්තර එළිපෙහෙළි කිරීම නීති විරෝධී යැයි තීන්දු කරමින් එම ප්රදේශයේ යළි ගස් සිටුවීමේ වැඩපිළිවෙළක් ක්රියාත්මක කරන ලෙස වන සංරක්ෂණ දෙපාර්තමේන්තුවට නියෝග කර තිබුණා.
එම ගස් සිටුවීමේ වැඩපිළිවෙළ සඳහා දැරීමට සිදුවන වියදම හිටපු අමාත්ය රිෂාඩ් බදියුදීන් විසින් ගෙවිය යුතු බවටද අභියාචනාධිකරණ නියෝගයේ සඳහන් වුණා.
එම අභියාචනාධිකරණ නියෝගය නීතියට පටහැනි බවත් තමන්ට එරෙහිව සිදුකර තිබෙන අදාළ නියෝග බලරහිත කරන ලෙස ඉල්ලමින් හිටපු අමාත්ය රිෂාඩ් බදියුදීන් මහතා විසින් ශ්රේෂ්ඨාධිකරණය වෙත මෙම පෙත්සම ඉදිරිපත් කර තිබෙනවා.