වත්මන් රජය මේවන විට අසූචි පොහොර නැවක් ලඟ දණින් වැටී ඇති බව විපක්ෂ නායක සජිත් ප්‍රේමදාස මහතා පවසනවා.
දේශප්‍රේමය ගැන, ස්වෛරී රටක් ගැන, මාතෘ භූමිය ගැන පේටන්ට් බලපත්‍ර ලියාගෙන සිටි ආණ්ඩුව මේ වනවිට සැඟවී ඇති බවත් කොමිස් කුට්ටිවලට මුළු රටම පාවා දෙමින් පුරවැසියාගේ ජීවිත සමඟ ආණ්ඩුව සෙල්ලම් කරමින් සිටින බවත් ඔහු පවසා සිටිනවා.
ඒ අද (24) දින ලුණුගම්වෙහෙර ප්‍රදේශයේ පැවති ගොවි හදගැස්ම වැඩසටහනට සහ ගොවි උද්ඝෝෂණයට එක් වෙමින්.
ප්‍රමිතියකින් තොර පොහොර ගෙන්වීම හරහා ක්ෂුද්‍ර ජීවීන්ගෙන් සිදුවන බලපෑම සමස්ත පරිසරයටම අදාළ බව පැවසූ ඔහු මේවා පිළිබඳව මායිම් නොකරන බලවතුන් කවුදැයි විමසා සිටිනවා.
චීන සමාගම සමඟ අත්සන් කළ ගිවිසුම කුමක්ද, අදාල පොහොර ප්‍රමිතියෙන් තොර නම් ගනු ලබන ක්‍රියාමාර්ග පිළිබඳව අදාල ගිවිසුමේ අත්සන් කළේ මොනවාද, පළමු පරීක්ෂණයෙන් අසමත් වූ විට හරවා යැවූ පොහොර නැව දෙවන පරීක්ෂණයේ ප්‍රතිඵල එන්නටත් පෙර ආපසු ගෙන්වූයේ කවුද, එම නැව ගෙන්වනු ලෙස බලපෑම් කළේ කවුද, ඒ බලපෑම්වලට යටත් වුයේ කවුද යන්න රටට හෙලිදරව් කළයුතු බවත් ඔහු අවධාරණය කරනවා.
රටට බරපතල හානි ගෙන එන නැවක් මෙරට වරාය ආශ්‍රිතව නැංගුරම් ලෑම පවා වරදක් බව ප්‍රකාශ කළ විපක්ෂ නායකයා එසේ නොකරන ලෙස ඉල්ලන්නට කෘෂිකර්ම අධ්‍යක්ෂවරයාට තිබූ කශේරුකාවවත් මේ ආණ්ඩුවට නැති බවද පැවසීය.
