හිටපු නාවික හමුදාපති අද්මිරල් ඔෆ් ද ෆ්ලීට් වසන්ත කරන්නාගොඩ මහතාට එරෙහි අධිචෝදනා ඉවත් කර ගැනීමට නීතිපතිවරයා ගත් තීරණයට විරෝධය පළ කරමින් පැහැර ගෙන ගොස් අතුරුදන් කළේ යැයි පැවසෙන තරුණයින් 11 දෙනාගේ පවුල් එකතුව අද (නොවැ.2 ) නීතිපති දෙපාර්තමේන්තුව ඉදිරිපිට විරෝධතාවක නිරත වුණා.
අතුරුදන්වූවන්ගේ පවුල් එකතුව අද නීතිපතිවරයා හමුවීමට පැමිණ තිබිණු අතර ඊට ඉඩ නොලැබීම හේතුවෙන් ඔවුහු මෙලෙස නීතිපති දෙපාර්තමේන්තුව ඉදිරිපිට මාර්ගයේ වාඩිවී විරෝධතාව දැක්වුවා.
විරෝධතාකරුවන් ප්‍රකාශ කළේ, වසර 13ක් මේ සම්බන්ධයෙන් නඩු විභාගය පැවති අතර හිටපු නාවික හමුදාපතිවරයාට එරෙහිව අධිචෝදනා 667ක් ගොනු කර තිබුණු බවයි.
එසේ වුව ද නීතිපතිවරයා හිටපු නාවික හමුදාපතිවරයාට එරෙහි චෝදනා ඉවත් කර ගැනීම මගින් තමන් යුක්තිය උදෙසා ගෙනගිය සටන පාවාදීමකට ලක්කළ බව ඔවුහු චෝදනා කළා.
එහිදී විරෝධතාවට එක්වූ අතුරුදහන් වූ තරුණයින්ගේ පවුල්වල පිරිස් වැඩිදුරටත් පැවසුවේ,
“නීතිපතිට කන්න දෙන්නේ අපි. අපේ සල්ලිවලින් පඩි ගන්නේ. ඔයාලත් පඩි ගන්නේ අපේ සල්ලිවලින්. ගෝඨාභය රාජපක්ෂගෙන් නෙවෙයි. ගෝඨාභය රාජපක්ෂ යපෙන්නෙත් අපෙන්.” යන්නයි.
