ඩාවෝ නගරයේ නගරාධිපති ලෙස නැවත තේරී පත්වීම සඳහා වන අපේක්ෂකත්ව ඉල්ලුම ඉන්ඩේ සාරා විසින් නියමිත කාල සීමාවට දින හයකට පෙර ඉල්ලා අස්කරගෙන ඇතැයි වාර්තා වෙනවා.
ඉන්ඩේ සාරා යනු පිලිපීන ජනාධිපති රොඩ්රිගෝ ඩුටර්ටේ සහ එළිසබත් සිමර්මන්ගේ දියණියයි.
ඇය ජනාධිපති හෝ උප ජනාධිපති ලෙස ජාතික තනතුරකට තරඟ කිරීමට ඉඩ ප්රස්ථාව ඇති බවට විවිධ මත පළ වෙමින් තිබූ අතර නගාරාධිපති අපේක්ෂකත්වය ඉල්ලා අස් කර ගැනීමත් සමඟ දේශපාලන කරළියේ උණුසුම් තත්ත්වයක් නිර්මාණය කර ඇතැයි පැවසෙනවා.
ඇගේ දේශපාලන පක්ෂය වන Hugpong ng pagbabago පක්ෂය ඇගේ ජනාධිපතිවරණ අපේක්ෂකත්වය අනුමත කර ඇති බව ද ඒ අතර සඳහන්.
ඇගේ පියා නියෝජනය කරන PDP-Laban පක්ෂය ද ඊට අනුමැතිය ලබා දී තිබෙනවා.
43 හැවිරිදි නීතිඥවරියක වන සාරා, ඩාවෝ නගරයේ වර්තමාන නගරාධිපතිනිය ලෙස ද කටයුතු කරනු ලබනවා.
එමෙන්ම 2010 ජුනි 30 සිට 2013 ජුනි 30 දක්වා ද එහි නගරාධිපතිනිය ලෙස කටයුතු කරනු ලැබුවේ ඇයයි.