ප්‍රමාණවත් බුද්ධි තොරතුරු ලැබී තිබියදී පාස්කු ඉරුදින ත්‍රස්ත ප්‍රහාරය වලක්වා ගැනීමට කටයුතු නොකිරීම සම්බන්ධයෙන් හිටපු ආරක්ෂක ලේකම් හේමසිරි ප්‍රනාන්දුට එරෙහිව නීතිපතිවරයා ගොනු කරන ලද අධිචෝදනා සම්බන්ධයෙන් ඉදිරිපත් වූ මූලික විරෝධතා ප්‍රතික්ෂේප කළ කොළඹ ත්‍රිපුද්ගල මහාධිකරණ විනිසුරු මඩුල්ල අද (23) සිට නඩුව විභාගයට ගැනීමට නියෝග කළා.
නාමල් බලල්ලේ, ආදිත්‍ය පටබැඳිගේ සහ මොහොමඩ් ඉර්ෂඩීන් යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල හමුවේ අද මෙම නඩුව කැදවු අවස්ථාවේදී හිටපු ආරක්ෂක ලේකම් හේමසිරි ප්‍රනාන්දුට එරෙහිව අධිචෝදනා කියවීමට ප්‍රථම ඔහු වෙනුවෙන් පෙනී සිටි ජනාධ්පති නීතිඥ මොහාන් කුලතුංග මහතා නීතිපතිවරයා ගොනු කර ඇති අධි චෝදනා සම්බන්ධයෙන් මුලික විරෝධතාවයක් මතුකළා.
එහිදි ජනාධිපති නීතිඥවරයා කියා සිටියේ විත්තිකරුට එරෙහිව පාස්කු ඉරුදින ත්‍රස්ත ප්‍රහාර මාලාව සම්බන්ධයෙන් මිනීමැරීමට පෙළඹවීම , මිනීමැරීමට කුමන්ත්‍රණය කිරීම හා නීතිවිරෝධී ආකාරයෙන් නොකරහැරිම යන චෝදනා පිළිබඳ වරදක් අනාවරණය නොවන බවයි.
ඒ අනුව විත්තිකාර හේමසිරි ප්‍රනාන්දු නිදොස්කොට නිදහස් කරන ලෙසට ජනාධිපති නීතිඥවරයා අධිකරණයෙන් ඉල්ලා සිටියා.
කෙසේ වෙතත් පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් සුදර්ශන සිල්වා මහතා සදහන් කළේ විත්තිකරුට එරෙහිව ඉදිරිපත් කළ සියලු චෝදනා ඔප්පු කිරීමට සාක්ෂි ඉදිරිපත් කිරීමට සූදානම් බැවින් නඩුව විභාගයට ගන්නා ලෙසයි.
කරුණු සලකා බැලු ත්‍රිපුද්ගල මහාධිකරණ විනිසුරු මඩුල්ල විත්තිකරු වෙනුවෙන් ඉදිරිපත් කළ මුලික විරෝධතා ප්‍රතික්ෂේප කරමින් හෙට (23) සිට විභාගය සදහා නඩුව කැදවීමට නියෝග කළා.
අනතුරුව විත්තිකරු වෙත චෝදනා පත්‍රයේ අඩංගු අධි චෝදනා කියවා දුන් අතර තමා සියලු චෝදනා වලට නිවැරදිකරු බව හිටපු ආරක්ෂක ලේකම් හේමසිරි ප්‍රනාන්දු අධිකරණය හමුවේ කියා සිටියා.
කෙසේ වෙත්ත් මෙම නඩුව විභාගයට ගැනීමට ත්‍රිපුද්ගල මහාධිකරණ විනිසුරු මඩුල්ල කළ නියෝගය සම්බන්ධයෙන් ශ්‍රේෂ්ඨාධිකරණයේ අභියාචනයක් ගොනු කිරීමට බලාපොරොත්තු වන බව විත්තියේ ජනාධිපති නීතිඥවරයා අධිකරණය හමුවේ පැවසුවා.
