අධිකරණ අමාත්‍යාංශය වසර දෙකක කාලයක් වෙනුවෙන් රුපියල් මිලියන 400ක කුලියකට ලෝක වෙළඳ මධ්‍යස්ථානයට ගෙනයෑම සඳහා කැබිනට් අනුමැතිය හිමි වී ඇතැයි සන්ඬේ ටයිම්ස් වාර්තා කර ඇත.
ඒ අනුව වර්ග අඩි 35,071ක බිම් කොටසක් ජනවාරි 01 වැනිදා සිට 2022 දෙසැම්බර් 31 දක්වා කුලියට ගැනීමට නියමිතය. 2021 වර්ෂය සඳහා මිලියන 233ක් සහ 2020 වර්ෂය සඳහා රුපියල් මිලියන 174ක් වෙන් කර ඇත.
මෙලෙස අධිකරණ අමාත්‍යාංශය ලෝක වෙළඳ මධ්‍යස්ථානයට ගෙනයෑමට හේතු වී ඇත්තේ ජනාධිපති ගෝඨාභය රාජපක්ෂ අලුතින් පත් කරන ලද අභියාචනාධිකරණ විනිසුරුවරුන් සඳහා අධිකරණ ගොඩනැගිල්ලක් ලෙස දැනට හල්ෆ්ට්ස්ඩ්‍රොප්හි අධිකරණ සංකීර්ණයෙහි පවතින අධිකරණ අමාත්‍යාංශ ගොඩනැගිල්ල බාරදීම සඳහාය.
රජයේ වියදම් අඩු කරගත යුතු බවට සංවාද පවතින කාලසීමාවක මෙතරම් අධික කුලියකට ගොඩනැගිල්ලක් ගැනීම විශාල නාස්තියක් බව ආණ්ඩුව අභ්‍යන්තරයේම සංවාද පවතින බව වාර්තා වේ. මීට පෙර ආණ්ඩුව අගමැති රනිල් වික්‍රමසිංහගේ කැබිනට් පත්‍රිකාවක් අනුව මාසයකට මිලියන 21ක පමණ මුදලකට කෘෂිකර්ම අමාත්‍යාංශය කුලියට ගත් අවස්ථාවේ මෙරට ජනමාධ්‍ය, සිවිල් සමාජය සහ විපක්ෂයේ සිටි දේශපාලන පක්ෂ එයට එරෙහිව අදහස් දක්වා තිබුණි.
