මහනුවර දිස්ත්‍රීක්කය නියෝජනය කරන රාජ්‍ය අමාත්‍යවරයෙකු අධික ලෙස බිමත්ව රුවන්වැලිමහාසෑයට පැමිණ එහි ආරක්ෂක රාජකාරියේ නිරතව සිටි පොලිස් නිලධාරින් සමග ගැටුමක් ඇතිකරගෙන තිබේ.
පසුගිය 05 වෙනිදා මධ්‍යම රාත්‍රියේ කොට කලිසමකින් සහ ටී ෂර්ටයකින් සැරසී සිය පවුලේ සාමාජිකයින් සහ ආරක්ෂක නිලධාරින් සමග ඔහු පැමිණ ඇති අතර අවේලාවේ එම පුජා භූමියට ඇතුළුවීමට අවසර දිය නොහැකිබවට ආරක්ෂක අංශ ප්‍රකාශ කිරීමත් සමග කුපිත වූ රාජ්‍ය ඇමතිවරයා පොලිස් නිලධාරීන්ට බැනවදිමින් පූජා භුමියේ කලහකාරී ලෙස හැසිරී ඇත.
රුවන්වැලිමහාසෑය වන්දනා කිරීමට බැතිමතුන්ට දිනපතා රාත්‍රී 10.00 වනතෙක් අවස්ථාව ලබා දෙන අතර ඉන්පසු එහි කිසිවෙකුටත් ඇතුළුවීමට නොහැකිවන ලෙස පොලිසිය විසින් ප්‍රධාන පිවිසුම් දොරටුවල ඉබි යතුරු දමා වසා දමා එම යතුරු සිය භාරයට ගැනීම සාම්ප්‍රදායිකව සිදුකරනු ලබයි.
එසේ තිබියදී මෙම අමාත්‍යවරයා එදින මධ්‍යම රාත්‍රී 12.00 ට පමණ සිය පවුලේ ඥාතින් සහ ආරක්ෂක නිලධාරින් ඇතුළු දොළොස් දෙනෙකුගෙන් පමණ සමන්විත කණ්ඩායමක් සමග රුවන්වැලිමහා සෑය වෙත පැමිණ ඇත.
රුවන්වැලිමහා සෑ පුදබිමට ඇතුළුවීමට සංඝමිත්තා මාවත දෙසින් ඉදි කොට තිබෙන තොරණ සහිත පිවිසුමෙන් ඇතුළුවීමට පැමිණි රාජ්‍ය ඇමතිවරයා එහි ආරක්ෂක රාජකාරියේ නිරතව සිට ඇති පොලිස් නිලධාරීන්ට තමන්ව හඳුන්වා දී තමන් ඇතුළු පිරිසට රුවන්වැලිමහසෑය වන්දනා කිරීමට යාමට අවශ්‍ය බව පවසා තිබේ.
එම අවස්ථාවේ එහි සිටි පොලිස් නිලධාරින් සෑම දිනකම රාත්‍රී 10.00 න් පසු මහසෑ භූමියට වසා දමන බැවින් ඊට අවසර දිය නොහැකි බව ඇමතිවරයාට පවසා තිබේ.
ඉන් ප්‍රකෝප වූ රාජ්‍ය ඇමතිවරයා “යකෝ මම ඇමතිවරයෙක්. ඇමති වරයෙකුට රුවන්වැලිසෑය වඳින්න දෙන්නෙ නැති නම් කවුද යකෝ වඳින්නෙ. එන්න කියාපියව් තොපේ මහ එකාට (පොලිස් ස්ථානාධිපතිවරයාට)”. යයි කියමින් ඝෝෂා කර තිබේ.
පැවති වර්ෂාව නිසා කළු පැහැති වැහි කබාවලින් සැරසී සිටි පොලිස් නිලධාරීන්ට “කළු ඇඳගෙන ගෙන ඉන්නෙ තොපි මොක්කුද” යනුවෙන් බැන වැදී ඇති අතර ඇමතිවරයාව සන්සුන් කිරීමට ඔහුගේ ආරක්ෂක නිලධාරින් සහ පවුලේ සාමාජිකයින් උත්සාහ දරා ඇතත් එය ව්‍යර්ථවී ඇත.
එම අවස්ථාවේදී රාජ්‍ය ඇමතිවරයා බලහත්කාරයෙන් ස්වර්ණමාලි මහසෑ විහාරස්ථානයේ ආවාස ගෙය දෙසින් මහසෑ ඇතුළුවීමට උත්සාහ දරා ඇති අතර ආරක්ෂක නිලධාරින්ද ඇමතිවරයාගේ ආරක්ෂාවට ඔහු පසුපසින් ගොස් ඇතත් ස්වර්ණමාලිමහසෑ භූමියට ඇතුළුවීමට හැකියාවක් ලැබී නොමැත.
එම අවස්ථාවේ අධික ලෙස බිමත්ව සිටි රාජ්‍ය ඇමතිවරයා වාරු නොමැතිව වරක් බිම ඇද වැටී ඇති බවද පැවසේ.
පසුව එහි මුරපොලේ සේවයෙහි නිරත පොලිස් නිලධාරින් මෙම සිදුවීම සම්බන්ධයෙන් උඩමළුව පොලිස් ස්ථානයට වාර්තා කොට ඇති අතර මේ බව පොලිස් නිලධාරින් විසින් පසුදින ස්වර්ණමාලිමහසෑ විහාරාධිකාරී පුජ්‍ය පල්ලෙගම් හේමරතන නාහිමිපාණන් වහන්සේටද සැල කොට ඇත.
රුවන්වැලිසෑ පින්බිමේදී රාජ්‍ය අමාත්‍යවරයෙකු පොලිසියට බලපෑම් සිදු කර බිමත්ව අවිනීතව සහ කලහකාරීව හැසිරුණු බව තමන් වහන්සේට රුවන්වැලිසෑය පොලිස් මුරපොලේ නිලධාරින් විසින් පෙරේදා (06) පෙරවරුවේ දැනුම්වත් කළ බව රුවන්වැලිමහසෑ විහාරාධිකාරී නුවරකලාවියේ ප්‍රධාන සංඝනායක පුජ්‍ය පල්ලේගම හේමරතන නාහිමියෝ පවසයි.
ඒ පිළිබඳව විමර්ශනයක් සිදු කොට නිත්‍යානුකුල පියවර ගැනීම පොලිසියේ රාජකාරියක් බව තමන් වහන්සේ පොලිස් නිලධාරීන්ට දැනුම් දුන් බවත් පුජ්‍ය පල්ලේගම හේමරතන නාහිමියෝ පවසයි.
