රටේ ආර්ථිකය නගා සිටුවිම සඳහා මුදල් අමාත්‍යාංශය විශේෂ ආර්ථික පැකේජයක් ජනතාව වෙත ලබාදෙන බව මුදල් අමාත්‍ය බැසිල් රාජපක්ෂ මහතා නිවේදනනය කරනවා.
ඒ අනුව සියලුම රජයේ සේවකයින්ට මසකට රුපියල් 5,000 විශේෂ දීමනාවක් ලබාදීමට කැබිනට් මණ්ඩලය තීරණය කර තිබෙනවා.
අදාළ දීමනාව 2022 වසරේ ජනවාරි මස සිට ලබාදෙන බව බැසිල් රාජපක්ෂ මහතා පවසනවා.
එමෙන්ම රජයේ විශ්‍රාමිකයන්ටත් මසකට රුපියල් 5000 ක විශේෂ දීමනාවක් ලබාදීමටත්, සමෘද්ධි ප්‍රතිලාභීන්ට ජනවාරි සිට මසකට රුපියල් 1,000 අමතර දීමනාවක් ලබා දීමටත් මුදල් අමාත්‍යාංශය තීරණය කර තිබෙනවා.
ආබාධිත සෙබලුන් සඳහාද අදාළ දීමනාව ලැබෙනු ඇති.
තවද කෘෂිකර්මික ක්ෂේත්‍රයේ වර්ධනයක් ඇති කිරීම සඳහා පර්චස් 20ට වඩා අඩු ඉඩම්වල ගෙවතුවල වගාව සඳහා රුපියල් 5,000 ක දීමනාවක් සහ පර්චස් 20 ත් අක්කරයත් අතර ඉඩම් සඳහා රුපියල් 10,000ක දීමනාවක් ලබා දීමටද රජය තීරණය කළ බව බැසිල් රාජපක්ෂ මහතා පවසනවා.
ගොවියන්ගේ අස්වැන්න සදහා වී කිලෝවක් රුපියල් 75 කට මිලදී ගැනීමට රජය සූදානම් බව මුදල් අමාත්‍යවරයා පවසනවා.
වතු කම්කරු පවුලක් සදහා මසකට තිරිගු පිටි කිලෝ 15 ක උපරිමයකට යටත්ව කිලෝවක් රුපියල් 80 බැගින් ලබාදීමටද මෙහිදී තීරණය වී තිබෙනවා.
එමෙන්ම සියලුම අත්‍යවශ්‍ය ආහාර හා බෙහෙත් සියලු බදුවලින් නිදහස් කිරීමටද අමාත්‍ය මණ්ඩලය අද (03) තීරණය කළ බව බැසිල් රාජපක්ෂ මහතා සදහන් කරනවා.
මේ අතර ගුරුවරුන් සඳහා වැඩි කරන ලද වැටුප මේ මස සිට ගෙවීමට කැබිනට් මණ්ඩල අනුමැතිය හිමිවූ බව අමාත්‍ය ගාමිණී ලොකුගේ මහතා පවසනවා.
අද (03) පැවති කැබිනට් මණ්ඩල රැස්වීමේදී මෙම තීරණය ගත් බවයි අමාත්‍යවරයා පවසන්නේ.
