රජය විසින් මාස ගණනක් තිස්සේ ලංකාවට ගෙන්වා නොගැනීම නිසා මැද පෙරදිග සිර වී සිටි ශ්‍රී ලාංකිකයින් 523 දෙනෙකු දිවයිනට පැමිණ තිබේ.
කොවිඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කළේ, එක්සත් අරාබි එමීර් රාජ්‍ය, කටාර් සහ ඉන්දියාවේ සිට ඒම පිරිස දිවයිනට පැමිණ ඇති බවය.
එක්සත් අරාබි එමීර් රාජ්‍යයේ සිට පුද්ගලයින් 300ක්, කටාර් සිට පුද්ගලයින් 127ක් සහ ඉන්දියාවේ සිට පුද්ගලයින් 96ක් මෙලෙස පැමිණ තිබේ.
මීට අමතරව අද දිනය තුළ තවත් ශ්‍රී ලාංකිකයින් 33 දෙනෙකු චීනයේ සහ ජර්මනියේ සිට දිවයිනට පැමිණිමට නියමිත බව කොවිඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කර ඇත.
එලෙස පැමිණෙන සියලු පුද්ගලයින් ත්‍රිවිධ හමුදාව මඟින් පාලනය කරනු ලබන නිරෝධායන මධ්‍යස්ථාන තුළ නිරෝධායන කටයුතු සඳහා යොමුකිරීමට නියමිතය.
පසුගිය කාලසීමාවේ මැදපෙරදිග රටවල්වල සිර වී සිටි ලාංකිකයන් තමන් ලංකාවට ගෙන්වාගන්නා ලෙස දිගින් දිගටම ඉල්ලීම් කළේය. ඇතැම් ලාංකිකයන්ට රැකියා අහිමිව මාවත්වල සිටින බව වීඩියෝ සහ ඡායාරූප පළ විය.
