තමන්ගේ ඉල්ලීමකට අනුව ඉන්දියාවේ ණය ආධාර යටතේ සෑදූ නිවාස ව්යාපෘතිය විවෘත කිරීමට ඉන්දීය අග්රාමාත්ය නරේන්ද්ර මෝඩිමහතා ශ්රී ලංකාවට පැමිණෙද්දී එදා කළු කොඩි දාන්නැයි කී ඇමතිවරුන්ම මෙදා ඉන්දියාවෙන් ණයට ලද තෙල් නැව පිළිගැනීමට උත්සවයකුත් පවත්වා යාම දෛවයේ සරදමක් බව විපක්ෂ නායක සජිත් ප්රේමදාස මහතා පවසනවා.
ඒ, අත්යවශ්ය රෝහල් උපකරණ තොගයක් කල්මුණේ රෝහල වෙත පරිත්යාග කිරීමේ අවස්ථාවට ඊයේ (16) දින සහභාගී වෙමින්.
සාමාන්යයෙන් උත්සවයක් පවත්වන්නෙ සුවිශේෂී කටයුත්තක් වෙනුවෙන් බව පැවසූ විපක්ෂ නායකවරයා ගම් උදාව, මහවැලි සංවර්ධන ව්යාපාරය, ඇඟලුම් කම්හල් දෙසීය වැඩසටහන, දරුවන්ට නිල ඇඳුම් බෙදා දීම වැලි කටයුතු වෙනුවෙන් උත්සව පවත්වනු ලැබූවත් මේ ආණ්ඩුව ණයට ලැබුණු ඩිසල් නැවක් පිළිගැනීමට පළමු වතාවට උත්සවයක් පැවැත් වූ බව පෙන්වා දෙනවා.
තවත් දින කිහිපයක් තුල නැවත වතාවක් තෙල් මිල ඉහළ දැමීමට රජයට සිදුවන බවත් එය මේ ඉතිහාසයේ වැඩිම තෙල් මිල ඉහළ යාම විය හැකි බවත් විපක්ෂ නායකවරයා පවසනවා.