රුසියානු ජනාධිපති ව්ලැද්මීර් පුටින් ඩිමෙන්ශියා, පාකින්සන් හෝ පිළිකා සඳහා ලබාදෙන ස්ටෙරොයිඩ් ප්‍රතිකාරයේ ප්‍රතිඵලයක් ලෙස මානසික නොසන්සුන්තාවක් නිසා ඇති වූ මොළයේ ආබාධයකින් පෙළෙන බව බුද්ධි අංශ වාර්තාවක් මඟින් හෙළිව ඇතැයි ඩේලිමේල් වෙබ් අඩවිය වාර්තා කරනවා.
එම බුද්ධි අංශ වාර්තා පෙන්වා දෙන්නේ
පසුගිය වසර පහක පමණ කාලය තුළ ඔහුගේ තීරණ ගැනීමේදී හඳුනාගත හැකි වෙනසක් සිදුවී ඇති බවයි.
මෙම හෙළිදරව්ව සිදුකරනු ලැබුවේ ක්‍රෙම්ලීනයට සමීප මූලාශ්‍ර උපුටා දක්වමින්, ඔස්ට්‍රේලියාව, කැනඩාව, නවසීලන්තය, එක්සත් රාජධානිය සහ එක්සත් ජනපදය යන ෆයිව් අයිස් බුද්ධි සන්ධානයේ ජ්‍යෙෂ්ඨ පුද්ගලයින් විසිනි.
69 හැවිරිදි ඒකාධිපතියාගේ ‘තඩිස්සි වූ මුහුණ සහ බෙල්ල’ දිගු කාලීන ස්ටෙරොයිඩ් භාවිතයේ ඇතිවිය හැකි අතුරු ආබාධ විය හැකි යැයි ඔවුන් පවසනවා.
රුසියානු ජනාධිපතිවරයාගේ පෙනුම හේතුවෙන් පසුගිය මාස කිහිපය තුළ ඔහුගේ සෞඛ්‍ය තත්ත්වය පිළිබඳ ප්‍රශ්න රැසක් මතුවී තිබුණා.
ඔහුගේ මෑත කාලීන ප්‍රසිද්ධ චාරිකා වලදී නැවත නැවතත් ‘අළු සහ පිම්බුණු’ පෙනුමක් දකින්නට ලැබුණු අතර ඔහු සුදුමැලි මළානික සමකින් යුක්ත වූ බවයි පැවසෙන්නේ.
වෙනත් ආරක්ෂක මූලාශ්‍ර පෙන්වා දෙන්නේ පුටින්ට ඔහුව පෞද්ගලිකව මුණගැසෙන අය සති දෙකක කාලයක් නිරෝධායනය වී තිබීම අනිවාර්ය බවයි.
ප්‍රසිද්ධියේ පෙනී සිටීමේදී මිනිසුන් තමාගෙන් සැලකිය යුතු දුරකින් තබාගැනීම සඳහා දිගු මේස භාවිතා කිරීමටද ඔහු තීරණය කර තිබෙනවා.
පසුගිය මාසයේ මොස්කව්හි දී ඔහු ප්‍රංශ ජනපති එමානුවෙල් මැක්‍රෝන් හමුවූයේ අඩි 13 ක මේසයක් හරහා සම්බන්ධ වෙමින් බවයි එම වාර්තා පෙන්වා දෙන්නේ.
