විපතට පත් ව්යාපාර ගලවා ගැනීම සඳහා පවත්වාගෙන යනු ලබන ෆෙඩරල් කොවිඩ් 19 වෛරස සහන අරමුදලෙන් ඇමරිකානු ඩොලර් මිලියන 20ක් වංචනික ලෙස ලබා ගැනීමට උත්සාහ කළ චීන ජාතිකයෙකුට බ්රහස්පතින්දා එක්සත් ජනපද අධිකරණයකින් වසර හතරක සිර දඬුවමක් නියම කර තිබේ.
එක්සත් ජනපද දිස්ත්රික් විනිසුරු රිචඩ් එම්. බර්මන් නිව්යෝර්ක් හි පැවති නඩු විභාගයකදී මෙසේ වසර 4 කුත් මාස 4 ක සිර දඬුවමක් ප්රකාශයට පත් කරනු ලැබුවේ මුගේ මා (Muge Ma) නම් සැකකරුට එරෙහිවයි.
ජාතික හදිසි අවස්ථාවකදී මිනිසුන්ට උපකාර කිරීම සඳහා පැවති රජයේ වැඩසටහන් අනිසි ලෙස භාවිතා කිරීමට එරෙහිව අන් අයට අනතුරු ඇඟවීමේ අවශ්යතාවය හා අපරාධයේ බරපතලකම සලකා සිරදඬුවම් නියම කළ බව විනිසුරුවරයා නඩු විභාගය අතරතුර දී පැවසීය.
38 හැවිරිදි මා, 2020 මැයි මාසයේදී ෆෙඩරල් බලධාරීන් විසින් අත්අඩංගුවට ගන්නා ලද අතර, වැටුප් ආරක්ෂණ වැඩසටහන සහ ආර්ථික අනතුරු ආපදා ණය වැඩසටහනෙන් ඇමෙරිකානු ඩොලර් මිලියන 20කට වඩා ලබා ගැනීම සඳහා අවම වශයෙන් බැංකු පහකට අයදුම් කර ඇතැයි හෙළිදරව් විය.
එම වැඩසටහන් දෙකම සැලසුම් කර ඇත්තේ කොවිඩ් 19 වෛරසය හේතුවෙන් වසා දැමීම්වලින් හානියට පත් ව්යාපාර ගලවා ගැනීම සඳහායි.
ඔහු විසින් පාලනය කරන ලද සමාගම් දෙකක් හරහා සියගණනක් සේවකයන්ට ඩොලර් මිලියන ගණනක වැටුප් ගෙවන බවට ව්යාජ ප්රකාශ සිදු කර මෙම පුද්ගලයා අදාළ වංචාවන් සිදුකර ඇති බව පැවසේ.