ප්‍රවීන රංගන ශිල්පී සහ සටන් අධ්‍යක්ෂක විල්සන් කරුණාරත්න මහතා අභාවප්‍රාප්ත වී තිබේ.
විල්සන් කරු නමින් ජනප්‍රිය වූ ඒ මහතා අභාවප්‍රාප්ත වන විට 79 වැනි වියේ පසුවුණා.
සිංහල සිනමාවේ හොඳම දුෂ්ඨ රංගන ශිල්පියෙකු ලෙස සැලකෙන විල්සන් කරූ මහතා දුෂ්ඨයාගේ චරිතය පමණක් චිත්‍රපට 240 කට වැඩි සංඛ්‍යාවක රඟපා තිබෙනවා.
විල්සන් කරු මහතාගේ මංගල සිනමා රංගනය 1974 දී සුබයාර් මකීම් විසින් අධ්‍යක්ෂණය කරන ලද ‘හදවත් නැත්තෝ ‘ චිත්‍රපටයයි.
මාලනී ෆොන්සේකාගේ සසර චේතනා චිත්‍රපටයේ නිකලස්ගේ චරිතය වෙනුවෙන් ඔහුට කුසලතා සම්මානයක් ද හිමිවුණා.
යකඩයා (1977), ජීවන ගඟ (1974), සරදියෙල්ගේ පුතා (1976), හිතුවොත් හිතුවාමයි (1977), හිත මිතුරා (1978), සෙලිනගේ වලව්ව (1978), වීර පුරන් අප්පු සහ කිවුලේ ගෙදර ඒ මහතා රඟපෑ චිත්‍රපට කිහිපයක්.
විල්සන් කරූ මහතා පිළිබදව මෑතකාලයේ වැඩිපුරම කතාබහට ලක්වූයේ කුප්‍රකට සංගීත ශිල්පී ඉරාජ් වීරරත්න විසින් ප්‍රවීන ගායන ශිල්පී වික්ටර් රත්නායක මහතාට අපහාසාත්මකව නිර්මාණය කළ ගීතයක වීඩියෝ පටයක රංගනයෙන් දායකවීමට විල්සන් කරූ මහතාව සම්බන්ධ කරගැනීමත් සමඟයි.
එම වීඩියෝවේ වික්ටර් රත්නායක මහතාගේ චරිතයට පණ පෙවීමට විල්සන් කරූ මහතාව ඉරාජ් වීරරත්න යොදාගෙන තිබුණු හෙයින් විල්සන් කරු මහතාට දැඩි විවේචන එල්ල වුණා.
පසුව විල්සන් කරූ මහතා ජනතාවගෙන් ඊට සමාව ඉල්ලා සිටි අතර අදාළ වීඩියෝව වික්ටර් රත්නායක මහතාට අපහාස කිරීමට නිර්මාණය කරන ලද්දක් බවට තමන් නොදැන සිටි බවට පාපොච්චාරණයක්ද ඉදිරිපත් කළා.
