පසුගිය 09 වනදා කොල්ලුපිටිය සහ ගාලුමුවදොර ප්‍රදේශවල ඇතිවූ කලහකාරී සිදුවීම්වලට සමගාමීව දිවයින පුරා ඇතිවූ ප්‍රචන්ඩකාරී ක්‍රියාවලට සම්බන්ධ පුද්ගලයින් 664 දෙනෙකු මේ වනවිට අත්අඩංගුවට ගෙන ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මහතා පවසනවා.
ඒ අනුව මේ සම්බන්ධයෙන් පසුගිය පැය 24 තුළදී අත්අඩංගුවට ගෙන ඇති සංඛ්‍යාව 258 ක්.
එම පිරිසෙන් 67 දෙනෙකු අධිකරණය වෙත ඉදිරිපත් කිරීමෙන් අනතුරුව ඇප මත නිදහස් කර ඇති බවත් තවත් 43 දෙනෙකු රක්ෂිත බන්ධනාගාරගතකර ඇති බවත් පොලිස් මාධ්‍යප්‍රකාශකවරයා වැඩිදුරටත් සදහන් කරනවා.
එසේම පසුගිය පැය 24 තුළදී අත්අඩංගුවට ගෙන ඇති තවත් පිරිසක් මේ වනවිට අධිකරණය වෙත ඉදිරිපත් කිරීමට නියමිතව බවයි ඔහු සදහන් කරන්නේ.
කෙසේ වෙතත් මේ වනවිට අත්අඩංගුවට ගෙන ඇති සමස්ත සංඛ්‍යාවෙන් පුද්ගලයින් 206 දෙනෙකු ඇප ලබා පිටවගොස් තිබෙනවා.
