ධම්මික පෙරේරා පොහොට්ටුවට – ධම්මිකගේ කොටස් මිල ඉහළට

කෝටිපති ව්‍යාපාරික ධම්මික පෙරේරා ශ්‍රී ලංකා පොදුජන පෙරමුණේ සාමාජිකත්වය ලබාගත් බව එම පක්ෂය පවසනවා.

ශ්‍රී ලංකා පොදුජන පෙරමුණේ මහ ලේකම් නීතිඥ සාගර කාරියවසම් මහතා අතින් ව්‍යාපාරික ධම්මික පෙරේරා මහතා ශ්‍රී ලංකා පොදුජන පෙරමුණේ සාමාජිකත්වය ලබා ගත් බවයි වාර්තා වන්නේ.

මේ අතර, කොළඹ කොටස් වෙළෙඳපොළ මිල දර්ශකවල කැපී පෙනෙන වර්ධනයක් ඊයේ (09) දිනයේ දී වාර්තා විය.

එහිදී දක්නට ලැබුණු සුවිශේෂී සිදුවීම නම් මෙරට ප්‍රකෝටිපති ව්‍යාපාරික ධම්මික පෙරේරා මහතා බහුතර කොටස් හිමිකාරීත්වය දරනු ලබන සමාගම් රැසක කොටස් මිල ගණන්වල කැපී පෙනන වර්ධනයක් දක්නට ලැබීමයි.

වැලිබල් වන් සමාගමේ කොටස් මිල 20% කින්, වැලිබල් ෆිනෑන්ස් සමාගමේ කොටස් මිල 15.97% කින්, ස්විස්ටෙක් (සිලෝන්) සමාගමේ කොටස් මිල 14.40% කින්, රෝයල් සෙරමික් සමාගමේ කොටස් මිල 10.49% කින්, ඇලුමෙක්ස් සමාගමේ කොටස් මිල 9.68% කින්, හේලීස් ලෙෂර් සමාගමේ කොටසක මිල 7.24% කින්, හේලීස් පිඑල්සී කොටස් මිල 6.64% කින්, ඩිප්ඩ් ප්‍රඩක්ට්ස් කොටස් මිල 6.50% කින්, රෙග්නිස් (ලංකා) කොටස් මිල 5.43% කින් ආදී වශයෙන් පෙර දිනයට සාපේක්ෂව කැපීපෙනෙන අයුරින් මිල ඉහළ ගිය සමාගම් වේ. මේ සමාගම් සියල්ලක්ගේ ම පාහේ පාලක කොටස් හිමිකාරීත්වය පවතින්නේ ධම්මික පෙරේරා මහතා සතුවය.

සියලු කොටස් මිල දර්ශකයේ වර්ධනයට වැඩිම දායකත්වයක් දෙන ලද සමාගම් අතර පෙරමුණ ගැනීමට ද ධම්මික පෙරේරා මහතාට අයත් රෝයල් සෙරමික්, වැලිබල් වන් හා හේලීස් යන සමාගම් අද දිනයේ දී සමත්ව තිබුණි.

ධම්මික පෙරේරා ඔහුට අයත් සියලු සමාගම්වල අධ්‍යක්ෂ මණ්ඩල තනතුරුවලින් ඉල්ලා අස්වීමට තීරණය කර ඇති නමුත් තවමත් අදාල කොටස් පවතින්නේ ඔහු සතුවයි.