එක්සත් ජනපදය ඇෆ්ගනිස්ථානයෙන් ඉවත් වී එහි තලේබාන් පාලනය නැවත පැමිණීමෙන් පසුව, බටහිර රාජ්‍යයන්ට යළිත් නැගී එන ත්‍රස්තවාදී තර්ජනයන් සමඟ පොර බැදීමට සිදුව ඇති බව විශ්ලේෂකයන් පිරිසක් පෙන්වා දී තිබේ.
මැදපෙරදිග භූ දේශපාලනය සහ ඉස්ලාමීය ත්‍රස්තවාදය පිළිබඳව අවධානය යොමු කරන බ්‍රිතාන්‍ය ආරක්ෂක විශ්ලේෂක කයිල් ඕර්ටන් පවසා ඇත්තේ ඇෆ්ගනිස්ථානය දැන් දේශපාලන භීෂණයේ අවුල් සහගත දේශයක් බවයි.
මේ හේතුවෙන් එහි මිලියන සංඛ්‍යාත ජනතාව සරණාගතයන් බවට පත්වී ඇති බවත්, සරණාගත රැල්ලක් සහ පැහැදිලි ත්‍රස්තවාදී තර්ජනයක් ඇති ඇෆ්ගනිස්ථානයේ අර්බුදය ඇෆ්ගනිස්ථානයට පමණක් සීමා නොවනු ඇති බවත් ඔහු පෙන්වා දී තිබේ.
සැප්තැම්බර් 11 ප්‍රහාරයේ අපරාධකරුවන් නැවත වරක් ඔවුන් එය දියත් කළ රාජ්‍යය පාලනය කරන බවත් ඔවුන්ගේ ප්‍රබලම අභියෝගකරුවා තවත් අන්තර් ජාතික ජිහාඩ්වාදී කණ්ඩායමක් වන ඉස්ලාමීය රාජ්‍යයේ කොරාසාන් පළාත හෙවත් අයිඑස්අයිඑස්වීම තත්වය වඩාත් සංකීර්ණ කර ඇති බවත් ඔහු පෙන්වා දී තිබේ.
ඇෆ්ගනිස්ථානයේ අපේක්ෂා කළ හැකි අනාගතය සඳහා බටහිර රටවලින් බරපතල අවධානයක් යොමුවීම අවශ්‍ය වන බව ද ඔහු මෙහිදී අවධාරණය කර ඇත.
තලේබාන් සංවිධානය බලය අත්පත් කර ගැනීමේදී, ඇෆ්ගනිස්ථානයේ සිරගෙවල් කැඩී ගොස් දහස් ගණනක් ජිහාඩ්වාදීන් නිදහස් වී ඇති අතර මෙහි බලපෑම ඇෆ්ගනිස්ථානය තුළ ඉතා ඉක්මනින් දැකගත හැකි වූ බවත් තලේබාන් සංවිධානයට ISKP පාලනය කිරීමට නොහැකි වූ බවත් ඔර්ටන් පෙන්වා දී තිබේ.
