ඊසාන දිග බෙංගාල බොක්කේ පිහිටා ඇති මියන්මාරයට අයත් කොකෝ දූපත් හි සිදුකර ඇති චීන ඉදිකිරීම් හේතුවෙන් ඉන්දියාවේ ආරක්ෂාවට තර්ජනයක් ගොඩනැංවී ඇති බවට ඇතැම් අන්තර්ජාතික මාධ්‍ය වාර්තා කර තිබේ.
පසුගිය කාලයේ ලබාගන්නා ලද චන්ද්‍රිකා ඡායාරූපවලට අනුව එම දූපත් ආශ්‍රිතව සිදුකර ඇති මෙම ඉදිකිරීම් යුදමය ඉදිකිරීම් වීම එයට හේතුවයි.
නාවික කටයුතු සම්බන්ධයෙන් හා බුද්ධි තොරතුරු ගවේෂණය පිණිස සන්නිවේදන මධ්‍යස්ථානයක් ද මෙහි පිහිටුවා ඇතැයි දැනට ලැබී ඇති තොරතුරුවලට අනුව අනාවරණය වී ඇත.
එම ඉදිකිරීම් වඩා වැදගත් වන්නේ මහජන විමුක්ති හමුදාවේ යුද හා නාවික බුද්ධි සංඥා බලකායන්ට බවද ප්‍රකාශිතය.
ඊට අමතරව චීන හමුදාව විසින් කුඩා කොකෝ දූපතේ හමුදා මූලස්ථානයක් ද ස්ථාපනය කර ඇතැයි පැවසේ. ඉන්දීය සාගරයේ සහ අන්දමන් මුහුදේ ඉන්දීය අන්දමන් දූපත්වලට උතුරට වන්නට මෙම ඉදිකිරීම් ස්ථානගත කර ඇත.
මෙලෙස වැඩිදියුණු කරන ලද යටිතල පහුසුකම් මගින් චීන ආරක්ෂක අංශයන්ට ඉන්දියාව විසින් බෙංගාල බොක්ක ආශ්‍රිතව සිදුකරන නාවික ක්‍රියාකාරකම් අධ්‍යයනය කිරීමට හා චාන්දිපූර්හි මිසයිල් අත්හදා බැලීම් අධීක්ෂණය කිරීමට හැකියාව හිමිවන බව සඳහන් වේ.
