අද දිනයෙන් පසු ඉන්ධන රැගත් නෞකා කිහිපයක්ම මෙරටට ළගාවීමට නියමිත බව ලංකා ඛනිජ තෙල් නීතිගත සංස්ථාව පවසනවා.
ඊට මෙට්‍රික් ටොන් හතලිස් දහස බැගින් වූ ඩීසල් නෞකා දෙකක් සහ මෙට්‍රික් ටොන් හතලිස් දහසක පෙට්‍රල් නෞකාවක් අයත්.
මේ අතර තෝරාගත් ඉන්ධන පිරවුම්හල්වලදී සෞඛ්‍ය කාර්ය මණ්ඩල සඳහා ප්‍රමුඛත්වය යටතේ ඉන්ධන ලබාදීමේ ක්‍රමවේදය අද සිට යළි ක්‍රියාත්මක කෙරෙනවා. ඒ අනුව, මීට ඉහතදී ක්‍රියාත්මක වී තාවකාලිකව අත්හිටවනු ලැබූ ක්‍රමවේදයට අනුවම මෙම ඉන්ධන ලබාදීම සිදු කිරීමට නියමිත බවයි සෞඛ්‍ය අමාත්‍යාංශය නිවේදනය කරන්නේ.
ඒ අනුව, තෝරාගත් ඉන්ධන පිරවුම්හල් 109 ක් හරහා සෞඛ්‍ය කාර්ය මණ්ඩල සඳහා ප්‍රමුඛතාව යටතේ ඉන්ධන නිකුත් කෙරෙනු ඇති.
මෙහිදී මෝටර් රථ සඳහා ඉන්ධන ලීටර් 20 ක්, ත්‍රිරෝද රථ සඳහා ඉන්ධන ලීටර් 8ක් සහ යතුරුපැදි සඳහා ඉන්ධන ලීටර් 6ක් ලබාදෙන ලෙසයි සෞඛ්‍ය අමාත්‍යාංශය ඉන්ධන පිරවුම්හල් හිමියන්ට දන්වා ඇත්තේ.
