ජාතික ඉන්ධන බලපත්‍ර ඔස්සේ ඉන්ධන නිකුත් කිරීමේ ක්‍රියාපටිපාටිය සම්බන්ධයෙන් ප්‍රචාරය වන සාවද්‍ය ප්‍රවෘත්තියක් පිළිබදව රක්ෂණ සමාගම් සියල්ලේම එකතුවෙන් සෑදුණු ශ්‍රී ලංකා රක්ෂණ සංගමය නිවේදනයක් නිකුත් කර තිබෙනවා.
ඒ අනුව එම සංගමය පවසන්නේ ජාතික ඉන්ධන බලපත්‍රය නිකුත් කිරීමේ ක්‍රියාපටිපාටියට රක්ෂණ සමාගම් විරෝධය පලකර ඇතිබවට වන ප්‍රචාර සම්පූර්ණයෙන්ම අසත්‍ය බවයි.
පසුගියදා සමාජ මාධ්‍ය ඔස්සේ ප්‍රචාරය වූයේ අදාළ ක්‍රමය ක්‍රියාත්මක වීමේදී ඉන්ධන පිරවුම්හල් අසළ ජංගම දුරකතන භාවිතා කිරීම හේතුවෙන් එය රක්ෂණ කොන්දේසි කඩකිරීමක් වන නිසාවෙන් ඉන්ධන පිරවුම්හල්වලට කිසියම් අලාභහානියක් හෝ ගිනි ගැනීමක් සිදුවුවහොත් කිසිදු රක්ෂණ ප්‍රතිලාභයක් අදාළ ඉන්ධන පිරවුම්හල් වෙත ලබානොදෙන බවට රක්ෂණ සමාගම් තීරණය කර ඇති බවයි.
ශ්‍රී ලංකා රක්ෂණ සංගමය පවසන්නේ QR කේතය භාවිතා කිරීමේ මෙම ක්‍රමවේදය හේතුවෙන් රක්ෂණය අවලංගුවීමක් කිසිසේත්ම සිදුනොවන බවයි.
