සර්ව පාක්ෂික වැඩපිලිවෙලක් සඳහා ජනාධිපති රනිල් වික්‍රමසිංහ කළ ආරාධනයට අනුව ලබන සිකුරාදා ඊට සහභාගි වීමට විපක්ෂ නායක සජිත් ප්‍රේමදාස සහ සමගි ජනබලවේගයේ කළමනාකරණ කමිටුව අද (02) තීරණය කර තිබෙනවා.
අද විපක්ෂ නායක කාර්යාලයේ පැවති සාකච්ඡාවකදී එම පක්ෂයේ ජාතික සංවිධායක, පාර්ලිමේන්තු මන්ත්‍රී තිස්ස අත්තනායක මේ බව සඳහන් කළා.
කෙසේ නමුත්, ප්‍රජාතන්ත්‍රවාදය, සමාජ සාධාරණත්වය උදෙසා වූ ජාතික මහජන සභාවට අනුබද්ධව නීතිඥ ප්‍රජාව සමග අද(02) කොළඹ විපක්ෂනායක කාර්යාලයේ පැවති රැස්වීමකදී විපක්ෂ නායක සජිත් ප්‍රේමදාස පවසා සිටියේ ‘රාජපක්ෂ සෙවනැලි ආණ්ඩුව’ මේ වෙනවිට රාජ්‍ය ප්‍රචණ්ඩත්වය සහ රාජ්‍ය මිලේච්ඡත්වය පාවිච්චි කරමින් ජනතාව පෙළීමට කටයුතු කරමින් සිටින බවයි.
ප්‍රජාතන්ත්‍රවාදය කෙළෙසන අලුත් මුහුණුවරක් ජන සමාජය තුල නිර්මාණය කිරීමට ආණ්ඩුව කටයුතු කොට ඇතැයි පැවසූ විපක්ෂවරයා, මීට එරෙහිව ශක්තිමත් ලෙස පෙනී සිටිය යුතු බවත් පවසා සිටියා.
ප්‍රජාතන්ත්‍රවාදය වෙනුවෙන් පෙනී සිටින සිවිල් ප්‍රජාව මඟ තොට දී හිංසනයට ලක්වන බවත්, ඔවුන්ට තර්ජනය එල්ල වී ඇති බවත් ඔහු මෙහි දී වැඩි දුරටත් කියා සිටියා.
