රටවැසියන්ගේ ආරක්ෂාව සහ මානව හිමිකම් ආරක්ෂා කිරීමට අසමත් වී ඇති බවට පකිස්තාන රජයට චෝදනා එල්ල වෙමින් තිබේ.
ඊට හේතුව වී ඇත්තේ එරට වෙසෙන සුළු ජන කොටස් ඉලක්ක කර එල්ල වෙමින් ඇති ප්‍රහාර වැළැක්වීමට හෝ එවැනි සිද්ධීන් පාලනය කිරීමට පකිස්තාන රජය අපොහොසත් වීමයි.
පකිස්තානයේ අහමදයියා ජන කොට්ඨාශය ඉලක්ක කර එල්ල වන ප්‍රහාර ද මේවනවිට ඉහළ ගොස් ඇති අතර එහි ආසන්නතම සිද්ධිය පන්ජාබ් ප්‍රදේශයෙන් වාර්තා වුණා.
එහිදී අහමදයියා ජන කොට්ඨාශයට අයත් 60 හැවිරිදි පුද්ගලයෙකු ඝාතනයට ලක්ව තිබුණේ පිහි ඇනුම් ප්‍රහාරයකින්.
මෙම සිදුවීම වාර්තා වුණේ අහමදයියා ජන කොට්ඨාහයට පකිස්තානය තුළ විවිධ බලපෑම් ඇති බවට චෝදනා එල්ල වෙමින් ඇති පසුබිමක් තුළයි.
මෙම සිදුවීමට විරෝධය පළ කරමින් අහමදයියා ජන කොට්ඨාශය පවසන්නේ පවතින තත්ත්වය හමුවේ තමන්ගේ භාෂණයේ නිදහස, ආගම ඇදහීමේ නිදහස හා ජීවත්වීමේ අයිතිය උල්ලංඝණය වී ඇති බවයි.
අදාළ ප්‍රහාරය හෙළා දකින පකිස්තානයේ මානව හිමිකම් කොමිසම රට තුළ වෙසෙන සියලු ජන කොට්ඨාශවල ආරක්ෂාව තහවුරු කිරීමට හා ආගමික මත දැරීමේ අයිතිය ආරක්ෂා කිරීමට රජය ව්‍යවස්ථාවෙන් බැඳී සිටින බව සදහන් කරයි..
