ජනතා විරෝධය හමුවේ රටින් පලාගිය හිටපු ජනාධිපති ගෝඨාභය රාජපක්ෂ මහතා යළි ඇමරිකාවේ පදිංචියට යාමට ඇමරිකානු ග්‍රීන් කාඩ් ලොතරැයියේ සහය පතන බවට ඩේලි මිරර් පුවත්පත වාර්තා කරනවා.
ජනපතිවයාගේ බිරිඳවන අයෝමා රාජපක්ෂ තවමත් ඇමරිකානු පුරවැසිභාවය යටතේ සිටින හෙයින් හිටපු ජනපතිවරයාටද ග්‍රීන්කාඩ් ලොතරැයිය ආධාරයෙන් යළිත් ඇමරිකාවේ පදිංචියට යාමට හැකි බවයි වාර්තා වන්නේ.
ඒ සඳහා ඔහු අයදුම් කිරීමට සුදුසුකම් ලබා ඇති බැවින් එක්සත් ජනපදයේ සිටින ඔහුගේ නීතීඥයින් මේ සඳහා වන අයදුම් කිරීමේ ක්‍රියා පටිපාටිය පසුගිය මාසයේ සිට ආරම්භ කර ඇති බව ඉහළ පෙළේ ආරංචි මාර්ග සඳහන් කරන බව ඩේලි මිරර් පුවත්පත වැඩිදුරටත් වාර්තා කරනවා.
මේ වන විට සිය බිරිඳ සමඟ තායිලන්තයේ හෝටලයක සිටින හිටපු ජනාධිපතිවරයා අවම වශයෙන් නොවැම්බර් මාසය දක්වා තායිලන්තයේ රැඳී සිටීමට අපේක්ෂා කරන බවයි වාර්තා වන්නේ.
කෙසේවෙතත් කුප්‍රකට මිග් ගණුදෙණුව සම්බන්ධයෙන් ප්‍රකාශයක් ලබාදීම සඳහා අපරාධ පරීක්ෂණ දෙපාර්තමේන්තුවට ඊයේ (17) පැමිණි රුසියාවේ හිටපු තානාපති උදයංග වීරතුංග මහතා සඳහන් කළේ එළැඹෙන 25 වැනිදා ගෝඨාභය රාජපක්ෂ මහතා යළිත් දිවයිනට පැමිණෙන බවට තමන්ට දුරකතන මාර්ගයෙන් දැනුම්දුන් බවයි.
