පසුගිය මැයි 09 වනදා කොළඹට පැමිණි ශ්‍රී ලංකා පොදුජන පෙරමුණේ ආධාරකරුවන් ඇතුළු පිරිස බේරේ වැවට තල්ලු කළ කණ්ඩායම සොයා පොලීසිය මේ වනවිට පුළුල් මෙහෙයුමක් ආරම්භ කර තිබෙනවා.
ඒ අනුව ඊට අදාළව ප්‍රාදේශිය සභා මන්ත්‍රීවරයෙකුට පහරදී මුදල් හා දේපළ කොල්ලකෑම සම්බන්ධයෙන් සැකකාරියක් අත්අඩංගුවට ගත් බව පොලීසිය සදහන් කරනවා.
මෙලෙස අත්අඩංගුවට ගෙන ඇත්තේ 26 හැවිරිදි කොල්ලුපිටිය ප්‍රදේශයේ පදිංචිකාරියක්.
පසුගිය මැයි 9 වැනිදා අම්බලන්ගොඩ ප්‍රාදේශීය සභාවේ මන්ත්‍රීවරයෙකුට කොල්ලුපිටිය ප්‍රදේශයේදී පහරදී තුවාල සිදුකර මුදල් පසුම්බිය කොල්ලකා මන්ත්‍රීවරයාව බේරේ වැවට තල්ලු කර ඇති බවට අදාළ තරුණියට චෝදනා එල්ලව තිබෙනවා.
ඒ සම්බන්ධයෙන් කොළඹ අපරාධ කොට්ඨාසය වෙත ලද පැමිණිල්ලක් අනුව සැකකාරිය අත්අඩංගුවට ගත් බව පොලීසිය පවසනවා.
අදාළ සිද්ධිය සම්බන්ධයෙන් සිදුකරන විමර්ශන මත සැකකාරිය ඊයේ (22) දහවල් කොළඹ අපරාධ පරීක්ෂණ කොට්ඨාසය වෙත පැමිණිමෙන් පසු ඇයව මෙලෙස අත්අඩංගුවට ගෙන තිබෙනවා.
