කැබිනට් මණ්ඩලයට නව අමාත්‍යවරුන් පත් කිරීම පිළිබඳව ජනාධිපති රනිල් වික්‍රමසිංහ, අග්‍රාමාත්‍ය දිනේෂ් ගුණවර්ධන සහ හිටපු ජනාධිපති මහින්ද රාජපක්ෂ අතර විශේෂ සාකච්ඡාවක් පවත්වා තිබෙනවා.
ඒ අනුව ශ්‍රී ලංකා පොදුජන පෙරමුණේ මන්ත්‍රීවරුන් සිව්දෙනෙක්ට ඇමතිධුර ලබා නොදීමට එකඟතාවයකට පැමිණ ඇති බවයි වාර්තා වන්නේ.
මෙලෙස අමාත්‍ය ධුර හිමි නොවන සිව් දෙනා වන්නේ මහින්දානන්ද අලුත්ගමගේ, නාමල් රාජපක්ෂ, ජොන්ස්ටන් ප්‍රනාන්දු සහ රෝහිත අබේගුණවර්ධන යන අයයි.
මේ අතර දැනට කැබිනට් මණ්ඩලයේ සිටින ඇතැම් ඇමතිවරුන්ගේ විෂය පථයන් ද වෙනස් වීමට ද නියමිතව තිබෙනවා.
ඒ අනුව මුදල් අමාත්‍ය ධුරය බොහෝ දුරට වෙනස් විය හැකි බවයි දේශපාලන ආරංචි මාර්ග වාර්තා කරන්නේ.
පසුගියදා සම්මත වූ 21 වන ව්‍යවස්ථා සංශෝධනයේ ඇති එක් වගන්තියක් වන්නේ ආරක්ෂක අමාත්‍ය ධුරය හැර වෙනත් ඇමති ධුරයන් දැරීමට ජනාධිපතිවරයාට නොහැකි බවයි.
මේ නීති තර්කය මත ජනාධිපතිවරයාට මුදල් හා ආර්ථික ප්‍රතිපත්ති අමාත්‍ය ධුරය දැරීමට නොහැකි වනවා.
එම නිසා මේ වන විට විදේශ කටයුතු ඇමති ධුරය දරන අලි සබ්‍රිහට යළිත් මුදල් අමාත්‍යවරයා පත් කිරීමට යෝජනා වී තිබෙනවා.
ඒ අනුව අයවැය යෝජනා ක්‍රියාත්මක කිරීමේ වගකීමට අමතරව ජාත්‍යන්තර මුල්‍ය අරමුදල සමඟ සාකච්ඡා කිරීම ද අලි සබ්‍රි අමාත්‍යවරයා වෙත පැවරෙනු ඇති.
