කොවිඩ් 19 වෛරසය පාලනය කිරීම සදහා නිපදවූ බව කියන ව්‍යාජ එන්නත් තොගයක් සමග පුද්ගලයින් 80 දෙනෙකු චීන පොලීසිය විසින් අත්අඩංගුවට ගෙන ඇති බව චීනයේ Xinhua ප්‍රවෘත්ති සේවය වාර්තා කරනවා.
මෙම මෙහෙයුම් වලදී කොවිඩ් එන්නත් ලෙස හඳුන්වනු ලැබූ ව්‍යාජ එන්නත් මාත්‍රා 3,000 කට වැඩි ප්‍රමාණයක් ද චීන පොලීසිය විසින් සොයා ගෙන තිබෙනවා.
Xinhua පුවත් සේවය වාර්තා කරන්නේ කොවිඩ් 19 වෛරසයට එරෙහි ඖෂධය වෙනුවට සේලයින් ලබාදීමේ ජාවාරමක් සම්බන්ධයෙන් සිදුකළ විමර්ශනයකදි මෙම පිරිස අත්අඩංගුවට ගෙන ඇති අතර මෙම මෙහෙයුම ඉකුත් සැප්තැම්බර් මාසයේ සිට ක්‍රියාත්මක කළ බවයි.
චීනයේ බීජිං අගනුවර, ෂැංහයි සහ නැගෙනහිර පළාතේ ෂැන්ඩොන්ග් හි ස්ථාන කිහිපයක චීන පොලිසිය විසින් මෙම වැටලීම් සිදුකර තිබෙනවා.
Xinhua පුවත් සේවය වැඩිදුරටත් වාර්තා කරඇත්තේ අදාළ ව්‍යාජ එන්නත් විදේශ රටවලට යොමු කිරීමටද සැකකරුවන් සැළසුම් කර ඇති බවට තොරතුරු අනාවරණය වී ඇති බවයි .
