ශ්‍රී ලංකා මහජන උපයෝගිතා කොමිෂන් සභාව වසා නොදමන බව නව සභාපති ජනක රත්නායක මහතා අවධාරණය කර තිබේ.
අද සිය ධුරයේ වැඩබාරගනිමින් ඒ් මහතා පෙන්වා දුන්නේ ශ්‍රී ලංකා මහජන උපයෝගිතා කොමිෂන් සභාව වසා දැමීම සම්බන්ධයෙන් පල වු අදහස් සාවද්‍ය තොරතුරු මත පදනම් වී ඇති බවයි.
ශ්‍රී ලංකා මහජන උපයෝගිතා කොමිෂන් සභාව පසුගිය දස වසරක කාලයක් තුල මහජනතාව වෙනුවෙන් විශාල සේවාවක් කර ඇති බවද නව සභාපතිවරයා පෙන්වා දෙනවා.
සභාපති ජනක රත්නායක මහතා ප්‍රකාශ කලේ ඉදිරියේදී ශ්‍රී ලංකා මහජන උපයෝගිතා කොමිෂන් සභාවේ සේවාව තවදුරටත් ශක්තිමත් කර විදුලි පාරිභෝගිකයාට උසස් සේවාවක් ලබාදීමට පියවර ගන්නා බවයි.
එමෙන්ම විදුලි ගාස්තු වැඩිකිරීමේ සුදානමක් නොමැති බවද නව සභාපතිවරයා අද (08) අනාවරණ කලා.
ඔහු පෙන්වා දුන්නේ වත්මන් විදුලි ගාස්තු පවා සාපේක්ෂව ඉහල මට්ටමක පවතින බවයි.
ඉදිරියේදී පුනර්ජනනීය බලශක්ති වැඩි වශයෙන් ජනන පද්ධතියට එක් කොට විදුලි පිරිවැය අඩු කල හැකි බවද ජනක රත්නායක මහතා පෙන්වා දුන්නා.
‘සෞභාග්‍යයේ ඉදිරි දැක්ම’ වැඩපිළිවෙළෙහි දැක්වෙන පුනර්ජනනීය බලශක්ති ඉලක්කය ළඟා කරගැනීම සදහා අවශ්‍ය සහාය ලබාදෙන බව ද ඔහු සදහන් කලා.
ඔහු පෙන්වාදුන්නේ විදුලිබල අවශ්‍යතාවයෙන් 70% ප්‍රමාණයක් පුනර්ජනනීය විදුලි ප්‍රභවයන්ගෙන් ලබාගැනීම රජයේ ඉලක්කය බවයි.
නව සභාපති ජනක රත්නායක මහතා අද සිය ධුරයේ වැඩ බාරගැනීමෙන් අනතුරුව ශ්‍රී ලංකා මහජන උපයෝගිතා කොමිෂන් සභාවේ 2021 ව්‍යාපෘති සැළැස්මද එළිදක්වනු ලැබුවා.
මේ වසරේදී නව ව්‍යාපෘති 111ක් ක්‍රියාවට නැගීමට නියමිතයි.
