නීතිපතිවරයා විසින් ලබාදෙන උපදෙස් මත ශ්‍රී ලංකා ක්‍රිකට් ආයතනය සම්බන්ධයෙන් ඉදිරි ක්‍රියාමාර්ග ගනු ලබන බව ක්‍රීඩා අමාත්‍යාංශ වාර්තා සඳහන් කරනවා.
පසුගිය වසරේ ඕස්ට්‍රේලියාවේ පැවැති පන්දුවාර විස්සයි විස්ස ක්‍රිකට් ලෝක කුසලානයට සහභාගී වූ ශ්‍රී ලංකා කණ්ඩායමේ සහභාගීත්වය සහ ඊට අදාළ සිදුවීම් සම්බන්ධයෙන් සොයා බැලීම සඳහා පත්කළ විමර්ශන කමිටුවේ වාර්තාව ඊයේ (17) නීතිපතිවරයා වෙත යොමු කිරීමට එම අමාත්‍යාංශය කටයුතු කළා.
ක්‍රීඩා අමාත්‍යාංශයේ අභ්‍යන්තර තොරතුරු වාර්තා කරන්නේ මේ වන විට ශ්‍රී ලංකා ක්‍රිකට් ආයතනය සම්බන්ධයෙන් ඉදිරි ක්‍රියාමාර්ග ගැනීමේ දී ජාත්‍යන්තර ක්‍රිකට් කවුන්සිලයේ මතයද විමසා බැලීමට නියමිත බවයි.
කෙසේ වෙතත් ඇතැම් තොරතුරු වාර්තා පෙන්වා දුන්නේ ශ්‍රී ලංකා ක්‍රිකට් ආයතනය විසුරුවා හැර අතුරු පාලක කමිටුවක් පත් කිරීමේ සුදානමක් පවතින බවයි.
