තම පක්ෂයේ සිටින බව කියන විදෙස් බුද්ධි අංශවලින් වැටුප් ගන්නා වෛද්‍යවරුන් දෙදෙනා ගැන විමර්ශනය කරන්නැයි ජනාධිපතිවරයාගෙන් ඉල්ලා සිටින බව ජාතික නිදහස් පෙරමුණේ නායක ඇමැති විමල් වීරවංශ මහතා අද(9) පැවැසීය.
ඇමැති වීරවංශ මහතා මේ බව පැවැසුවේ ආණ්ඩුවේම ඇතැමුන් බුද්ධි අංශවලින් වැටුප් ගන්නා පිරිස් ජාතික නිදහස් පෙරමුණේ ඇති බවට නැගූ චෝදනාව ගැන මාධ්‍යවේදීන් කළ ප්‍රශ්නකිරීමට පිළිතුරු දෙමිනි.
එවැනි විමර්ශනයක් සඳහා පොලිස්පතිවරයාට උපදෙස් දෙන්නැයි ජනාධිපතිවරයාගෙන් ඉල්ලා සිටින්නේ යැයි කී ඇමැතිවරයා එම චෝදනා බොරු අවලාද යැයි ද කීවේය.
ශ්‍රී ලංකා පොදුජන පෙරමුණේ නායකත්ව තනතුරක් ජනාධිපතිවරයාට ලැබිය යුතුය යන්නෙන් අදහස් කරන්නේ අගමැති මහින්ද රාජපක්ෂ මහතා එහි නායකත්වයෙන් ඉවත් කිරීම නොවන්නේ යැයි ද ඇමැතිවරයා කීවේය.
ආණ්ඩු පක්ෂයේ නවක මන්ත්‍රීවරුන්ගේ චෝදනා පොඩි දරුවන් බඩු පොඩි කිරීමකට සමාන කළ හෙතෙම වෙනත් පක්ෂයක් ගැන කතා නොකරන්නැයි ආණ්ඩුක්‍රම ව්‍යවස්ථාවේ කොතැනකවත් සඳහන් වී නැතැයි ද වැඩිදුරටත් සඳහන් කළේය.
