හෘදය සම්බන්ධයෙන් වූ පරීක්ෂණයක් කිරීම සඳහා කොළඹ ජාතික රෝහලට ඇතුළත් කළ අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ශානි අබේසේකර මහතා ඉහළ දේශපාලන නියෝගයක් මත බන්ධනාගාර රෝහලට මාරු කිරීමේ සූදානමක් ඇතැයි ‘නිව්ස් 19’ ට වාර්තාවේ.
කොරෝනා වයිරසය වැළඳීමන් පසුව කොළඹ අයි.ඩී.එච් රෝහලේ ප්රතිකාර ලබමින් සිටි අබේසේකර මහතා අදාළ වෛද්ය පරීක්ෂණය සඳහා ජාතික රෝහලට ඇතුලත් කෙරුණේ පසුගියදාය.
ශානි අබේසේකර මහතා රිමාන්ඩ් බන්ධනාගාරගත කිරීමෙන් පසුව දිගින් දිගටම ඔහුට දේශපාලනික කාරණා මුල් කරගෙන වෙනස් ලෙස සැලකීමක් සිදුවන බවට ශ්රී ලංකා තරුණ ජනමාධ්යවේදීන්ගේ සංගමය ශ්රී ලංකා මානව හිමිකම් කොමිසමට පැමිණිල්ලක් කරනු ලැබුවේ පසුගිය වසරේ නොවැම්බර් 25 වැනිදාය.
එයින් පසුව මානව හිමිකම් කොමිසම විසින් අබේසේකර මහතාගේ ආරක්ෂාව තහවුරු කරන ලෙස බන්ධනාගාර කොමසාරිස් ජනරාල්වරයාට නියෝගයක් ද කරනු ලැබීය.
කෙසේ වෙතත් මේ වනවිට නැවතත් දේශපාලනික වශයෙන් ඔහු ඉලක්ක කරගනිමින් යම් තීරණ ගැනීමකට සූදානමක් ඇති බව වාර්තා වේ.