බද්දේගම ක්‍රිස්තුරාජ පිරිමි විද්‍යාලයේ විදුහල්පතිවරයා කොවිඩ් ආසාදිතයෙකු බවට හදුනාගැනීමෙන් පසුව එම පාසලේ ගුරුවරුන් 60 දෙනෙක් නිරෝධායනයට යොමුකර තිබෙනවා.
අදාල විදුහල්පතිවරයා PCR පරීක්ෂණයක් සිදුකර ගැනීමෙන් පසුව නැවතත් පාසලට පැමිණ රාජකාරී කටයුතුවල නිරතව ඇති අතර පසුව පැමිණි PCR පරීක්ෂණ වාර්තාවෙන් ඔහු කොවිඩ් ආසාදිතයෙකු බවට හදුනාගෙන තිබෙනවා.
ඒ අනුව ඔහුගේ ආශ්‍රිතයන් වූ ගුරුවරුන් 60 දෙනෙකු මෙලෙස නිරෝධායනයට යොමුකිරීමට කටයුතු යොදා තිබුණා.
මේ සම්බන්දයෙන් අදහස් දක්වමින් ලංකා ගුරු සංගමය පවසන්නේ කොවිඩ් පරීක්ෂණවලට ලක්වන හා නිරෝධායනයට ලක්වන ගුරුවරුන් සහ විදුහල්පතිවරුන් සම්බන්දයෙන් නිශ්චිත ක්‍රමවේදයක් සකසා නොතිබීම හේතුවෙන් මෙලෙස අර්බුදකාරී තත්ත්වයන් ඇතිවන බවයි.
PCR පරීක්ෂණයකට ලක්වීමෙන් අනතුරුව එහි ප්‍රතිපල ලැබෙන තෙක් සේවයට වාර්තා නොකර සිටීමට නොහැකි බැවින් අදාල පුද්ගලයන් පාසලට පැමිණෙන බවත් ඉන් අනතුරුව ඔවුන්ගේ ප්‍රතිපල ධනාත්මක වුවහොත් ඔහුගේ ආශ්‍රිතයන් යැයි සදහන් කරමින් අනෙක් ගුරුවරුන්ද මෙලෙස නිරෝධායනයට ලක්වීම පාසල් පද්ධතිය පවත්වාගෙන යාමට ගැටළු ඇතිකරන බව එම සංගමය පෙන්වා දෙනවා.
එමෙන්ම නිරෝධායනයට ලක්වන ගුරුවරුන්ගේ නිවාඩු සම්බන්දයෙන් නිසි ක්‍රමවේදයක් සකසා නොමැති වීමෙන් ගුරුවරුන් දැඩි අපහසුතාවයට පත්ව ඇති බවයි එම සංගමයේ ලේකම් ජෝසප් ස්ටාර්ලින් මහතා පෙන්වා දෙන්නේ.
ඊට අදාල දර්ශන පහතින්,
