2020 ඔක්තෝබර් මාසය අවසානයේ ශ්‍රී ලංකා මහ බැංකුවේ නවතම සංඛ්‍යාලේඛනවලට අනුව නිල සංචිත වත්කම් ප්‍රමාණය එක්සත් ජනපද ඩොලර් මිලියන 5,858.5 ක් ලෙසින් වාර්තා වෙනවා.
මෙම අගය 2020 සැප්තැම්බර් 30 දිනට ඩොලර් මිලියන 6,666.3 ක් ලෙසින් සටහන් වුණා. ඔක්තෝබර් මාසය තුළ දී ඩොලර් මිලියන 807.8කින් නිල සංචිත වත්කම් ප්‍රමාණය පහළ ගොස් තිබෙනවා.
මෙහිදී විදේශ විනිමය සංචිතය ඔක්තෝබර් මාසය තුළ දී ඩොලර් මිලියන 6,188.9 සිට ඩොලර් මිලියන 5,384.9 ක් දක්වා ඩොලර් මිලියන 804කින් පහළ යාම මෙලෙස සංචිත වත්කම්වල අඩුවීමට ප්‍රධාන ලෙසින් දායක වී තිබෙනවා.
2020 ඔක්තෝබර් දෙවැනි දින ශ්‍රී ලංකා මහ බැංකුව රජය වෙනුවෙන් කල් පිරෙන එක්සත් ජනපද ඩොලර් බිලියනයක් වටිනා ජාත්‍යන්තර ස්වෛරීත්ව බැඳුම්කරයක්, නියමිත කූපන ගෙවීම් ද සහිතව, පියවනු ලැබුවා. සංචිත වත්කම්වල පහළ යාම සඳහා එය ප්‍රධාන වශයෙන් හේතු වුණා.
