පසුගිය (28) වනදා පැවති පොදුජන පෙරමුණේ කටාන ආසන බල මණ්ඩල රැස්වීම ඉතා උණුසුම් මුහුණුවරක් ගනු ලැබූවේ ශ්‍රී ලංකා පොදුජන පෙරමුණේ ප්රාදේශීය සභා මන්ත්‍රීවරයෙකු දිගින් දිගටම පොහොට්ටුවේ වැඩපිළිවෙල සහ නායකයන් විවේචනය කිරීම හේතුවෙන්.
ප්රාදේශීය සභා මන්ත්‍රී සිසිර ප්‍රනාන්දු මහතා ප්‍රකාශ කළේ පොහොට්ටුවේ නායකයන්ගේ ක්‍රියාකලාපය හේතුවෙන් ප්රාදේශීය නායකයන් ලෙස තමා වැනි පුද්ගලයන්ට ජනතාව ඉදිරියට ගොස් කොන්ද කෙලින් තබාගෙන පක්ෂය වෙනුවෙන් පෙනී සිටීමට නොහැකි වී ඇති බවයි.
පසුගිය මැතිවරණවලදී ලබාගත් ජනතා ප්‍රසාදය ආරක්ෂා කරගත නොහැකි වී ඇති බවත් ඒ සඳහා පක්ෂයේ ඉහළ නායකයන් වගකිව යුතු බවත් රැස්වීමට සහභාගී වූ ජනතාව අමතමින් ඔහු සදහන් කළා.
කටාන ආසනයට රජයේ රැකියා 700 ක් ලැබුණු නමුත් පක්ෂයට සහය දැක්වූ තරුණ තරුණියන් කිසිවෙකුටත් රැකියාවක් ලබාදීමට නොහැකි වූ බවද මෙහිදී ඔහු ප්‍රකාශ කර සිටියා.
සිසිර ප්‍රනාන්දු මහතා පෙන්වා දුන්නේ මෙවැනි තත්වයක් යටතේ පළාත් සභා මැතිවරණයට ඉදිරිපත් වුවහොත් අන්ත පරාජයක් ලැබීමට සිදුවනු ඇති බවයි.
