ජැක්සන් ඇන්තනී මහතාගේ ‘ඇඩ්‍රස් නෑ’ චිත්‍රපටයේ ගීතයක් භාතිය-සන්තුෂ් යන අයට අයත් සමාගමක් මගින් ප්‍රතිනිෂ්පාදනය කිරීමේ සිදුවීමකට අදාලව පසුගියදා දැඩි කතාබහකට ලක්වුණා.
අදාල සිදුවීමේදී ගිත රචක මහාචාර්ය සුනිල් ආරියරත්න මහතා සහ ගීතයේ තනු නිර්මාණය කරන ලද ආචාර්ය රෝහණ වීරසිංහ මහතා සදහන් කර තිබුණේ ඔවුන්ගේ කිසිදු අවසරයකින් තොරව හා කතෘ භාගයක් ගෙවීමකින් තොරව අදාල ගීතය කොල්ලකා ඇති බවයි.
මීට අදාලව ගීත නිර්මාණක කේන්ද්‍රය (OSCA) සංවිධානය කමිටුවක් පත්කර අදාල ගැටළුව පිළිබදව සොයාබැලීමට කටයුතු කර තිබෙනවා.
සරත් ද අල්විස්, අර්නස්ට් ද සොයිසා, ආචාර්ය සෝමරත්න දිසානායක, විශාරද එඩ්වඩ් ජයකොඩි, බන්දුල නානායක්කාරවසම්, නීලාර් එන්.කාසිම්, රොහාන් ද සිල්වා, ජානක වික්‍රමසිංහ, නලීන් පෙරේරා හා සමන්ත පෙරේරා යන කමිටු සාමාජිකයින්ගෙන් යුත් කමිටුව ඊට අදාල වාර්තාව පසුගියදා ඔස්කා සංවිධානය වෙත භාරදීමට කටයුතු යොදා තිබුණා.
ඊට අනුව අදාල වාර්තාවේ දැක්වෙන්නේ භාතිය-සන්තුෂ් නියෝජනය කරන සමාගම මඟින් චිත්‍රපටයේ නිෂ්පාදකගෙන් විමසා ඔහුට අදාළ ගීතයේ හිමිකම ඇතිබවට ලේඛන ඉදිරිපත් කර තිබූ බැවින් කතෘභාග මුදලක් ගෙවා තිබූ අතර එය කිසිසේත්ම ගීත මංකොල්ලයක් හෝ හොරකම් කිරීමක් නොවන බවයි.
