පසුගිය මාර්තු මස 10 වනදා පුද්ගලයින් සිව් දෙනෙකු විසින් තමන්ව පැහැරගෙන ගොස් පහරදී චිප් පතක් ඉල්ලූ බවට සියරට පුවත්පතේ මාධ්‍යවේදියෙක් විසින් පසුගියදා පොලීසියට පැමිණිල්ලක් සිදුකර තිබුණා.
නමුත් මේ වන විට සිදුකරගෙන ගිය විමර්ශන මගින් අනාවරණය වී ඇත්තේ ඔහු පැවසූ සියලු කරුණු අසත්‍ය බවයි.
පොලීස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සදහන් කරන්නේ කොළඹ අපරාධ කොට්ඨාසය මගින් සිදුකරන ලද විමර්ශන මඟින් අනාවරණය වී ඇත්තේ ඔහු විසින්ම ඔහුගේ නිවසේදී මේසන් හැන්දකින් ඔහුගේ දෙඅත් පුළුස්සාගෙන තිබෙන බවටයි.
මෙම පුද්ගලයා ඉන්පසුව තිඹිරිගස්යාය ප්‍රදේශයේ පිහිටි චතුර සේනාරත්න විසින් පවත්වාගෙන යනු ලබන කාර්යාලයකට ගොස් ඇති බවත් එම කාර්යාලයට පැමිණි පාර්ලිමේන්තු මන්ත්‍රී රාජිත සේනාරත්න මහතා ඔහුව හමුවූ බවත් සුජීව ගමගේ නැමැති 62 හැවිරිදි මෙම මාධ්‍යවේදීයා මේ වන විට පොලීසියට පාපෝච්චාරණය කර තිබෙනවා.
ඒ අනුව අසත්‍ය පැමිණිල්ලක් සිදුකිරීම සම්බන්ධව එම පුද්ගලයාව මේ වනවිට අත්අඩංගුවටගෙන ඇති අතර සිදුවීම සම්බන්ධයෙන් කොළඹ අපරාධ කොට්ඨාසයේ නිලධාරීන් විසින් පාර්ලිමේන්තු මන්ත්‍රී රාජිත සේනාරත්න මහතාගෙන් සහ චතුර සේනාරත්න මහතාගෙන් ප්‍රකාශ ලබාගැනීමට නියමිත බවද නියෝජ්‍ය පොලිස්පති අජිත් රෝහණ මහතා පවසනවා.
