නොරොච්චෝල, ආලංකුඩාවේ පදිංචි 14 හැවිරිදි දැරියක් පිළිස්සීම් ඇතුළු දරුණු වධ හිංසනයන්ට ලක්ව කුකුල් කූඩුවක සිටියදී පොලීසිය විසින් සොයාගෙන තිබෙනවා.
නොරොච්චෝල – ආලංකුඩාව ප්‍රදේශයේ පදිංචිව සිටි පුද්ගලයෙක් අවුරුද්දක් වයසැති සිය දියණිය හදාවඩා ගැනීම සදහා තම සහෝදරියට මීට වසර 13කට පෙර ලබාදී තිබෙනවා.
පසුව ඇය වැඩෙත්ම දැරියගේ නැන්දණිය ඇයට වෙනස්කම් සිදුකර ඇති අතර දැරියට පාසල් අධ්‍යාපනය පවා ලබාදී නොමැති බවයි වාර්තා වන්නේ.
දැනට වසර දෙකක කාලයක පටන් ඇයව නිරන්තරයෙන් දරුණු වධ හිංසනයන්ට ලක්කර දම්වැලකින් බැඳ, කුකුල් කූඩුවක සිරකර ඇති බවට නොරොච්චෝල පොලීසිය වෙත තොරතුරක් ලැබී තිබෙනවා.
ඒ අනුව පසුගිය සිකුරාදා (23) දිනයේ එහි ගිය පොලිස් නිලධාරීන් හට මෙම දැරියව සොයාගැනීමට හැකිවී තිබෙනවා.
ඇයට සිදුවී තිබූ තුවාල හේතුවෙන් හා ඇයගේ දුර්වල සෞඛ්‍ය තත්ත්වය හේතුවෙන් දැරියව පුත්තලම මූලික රෝහලට ඇතුළත් කළා.
පොලීසිය සඳහන් කරන්නේ දැරියගේ සිරුර පුරා දරුණු පිලිස්සීම් තුවාල සහ හිසේ ස්ථාන කිහිපයකම දරුණු තුවාල නිරීක්ෂණය වූ බවයි.
එමෙන්ම නිසි ලෙස ආහාර පවා නොලැබූ ඇය අසල්වැසි නිවෙස්වලින් ආහාර සොරාගැනීම හේතුවෙන් ද විවිධ පහරකෑම්වලට ලක්ව තිබෙනවා.
කෙසේ වෙතත් සිදුවීමට අදාළ දැරියගේ නැන්දණිය අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව ඇයව ලබන 2වනදා දක්වා රක්ෂිත බන්ධනාගාර ගත කර තිබෙනවා.
දැරියගේ පියාද නොරෙච්චෝලේ පොලීසිය විසින් අත්අඩංගුවට ගෙන ඇති අතර පසුව අධිකරණයට ඉදිරිපත් කිරීමෙන් අනතුරුව ඔහු ශරීර ඇප මත මුදා හැරුණා.
