ශ්‍රී ලංකා පොදුජන පෙරමු‍ණේ තනතුරුවල වෙනසක් සිදු කරන බව එහි ප්‍රධාන ලේකම් නීතිඥ සාගර කාරියවසම් මහතා පවසනවා.
ඔහු පවසන්නේ ලබන මාසයේ පැවැත්වීමට නියමිත පක්ෂ මහ සමුළුවේදී මෙම තනතුරු වෙනස් කිරීම් සිදු කරන බවයි.
විශේෂයෙන් පසුගිය කාලසීමාව තුළ ශ්‍රී ලංකා පොදුජන පෙරමුණ පක්ෂයක් ලෙස ගනු ලැබූ දේශපාලන තීන්දුවලට එරෙහිව යමින් කටයුතු කළ දැනට පක්ෂයේ ප්‍රධාන පෙළේ තනතුරු දරණ පුද්ගලයින් එම තනතුරුවලින් ඉවත් කිරීමටද එහිදී කටයුතු කරන බව සාගර කාරියවසම් මහතා සදහන් කරනවා.
පසුගියදා පාර්ලිමේන්තුවේ අනුප්‍රාප්තික ජනාධිපතිවරයා තෝරාගැනීමේ ඡන්ද විමසීමේදී ශ්‍රී ලංකා පොදුජන පෙරමුණ පක්ෂයක් ලෙස රනිල් වික්‍රමසිංහ මහතාට සහය දැක්වීමට තීරණය කළා.
එහෙත්, එහිදී පක්ෂයේ සභාපති මහාචාර්ය ජී. එල්. පීරිස්, භාණ්ඩාගාරික ඩලස් අලහප්පෙරුම යන මහත්වරුන් ඇතුළු පිරිසක් ඊට එරෙහිව වෙනත් මතයක පිහිටා කටයුතු කරනු ලැබූවා.
