තිදරු මවක කැපුම් තුවාල සහිතව අභිරහස් ලෙස ඊයේ (17) මිය ගොස් ඇති බව අලුත්ගම පොලීසිය පවසනවා.
මෙලෙස මිය ගොස් ඇත්තේ, මොරගල්ල – කාලවිලවත්ත ප්රදේශයේ පදිංචි ව සිටි එස්.ශිරානි ලක්ෂිකා කුමාරි නමැති 47 හැවිරිදි කාන්තාවක්.
මිය ගොස් ඇති කාන්තාව මුහුණේ කැපුම් තුවාල සහිතව නිවසේ වැටී සිට ඇති අතර, ඇය ව බේරුවල ප්රාදේශීය රෝහලට රැගෙන ගොස් ඇතත් ඒ වන විටත් ඇය මිය ගොස් සිට ඇති බව වාර්තා වනවා.
ඒ අනුව පොලිස් විමර්ශනවල දී නිවසේ නිදන කාමරයේ, මැදසාලය සහ ඉදිරිපස දොරටු අසල ලේ පැල්ලම් දක්නට ලැබෙන බව පෙනී ගොස් තිබෙනවා.
මරණකාරිය මෙම සිද්ධියට මුහුණ පාන අවස්ථාවේ නිවස තුළ කාන්තාවගේ ස්වාමියා, පුතකු සහ දියණියක එම නිවසේ සිට ඇති බවට තහවුරු වී ඇති බව පොලීසිය පවසනවා.
කෙසේ වෙතත් ඔවුන් පොලීසියට ප්රකාශ කර ඇත්තේ, ඔවුන්ගේ මව තුවාල සහිත ව නිවසේ ඉදිරිපස ප්රධාන දොරටුව අසල වැටී සිටිය දී රෝහල්ගත කළ බවයි.
මෙම අභිරහස් ඝාතනය නිවසේ සිටි පුද්ගලයෙකු සිදු කළේද, එසේත් නැති නම් බාහිරින් පැමිණි පුද්ගලයකු සිදු කළේද යන්න පිළිබඳ පොලිස් විමර්ශන ආරම්භ කර තිබෙනවා.