2023 අංක 6 දරන පාර්ලිමේන්තු අයවැය කාර්යාල පනතේ 14 වැනි වගන්තිය යටතේ පාර්ලිමේන්තුව සඳහා ‘අයවැය නිලධාරි’ නමින් නව තනතුරක් පිහිටුවා තිබෙනවා.
පාර්ලිමේන්තුවේ නිල වෙබ් අඩවියට අනුව එම අයවැය නිලධාරියාගේ මූලික වැටුප රුපියල් 408,360ක් වන අතර සියලු දීමනා සමඟ වැටුප රුපියල් 665,000ක් වනු ඇති.
අදාළ නිලධාරියාගේ වයස් සීමාව අවුරුදු 65ට අඩු විය යුතු වනවා.
තවද ඔහුට හෝ ඇයට රජයේ අයවැයකරණය, මූල්‍ය ප්‍රතිපත්ති, හෝ සාර්ව ආර්ථික විශ්ලේෂණය පිළිබඳ අවම වශයෙන් වසර 15ක පළපුරුද්දක් සතු විය යුතුයි.
කෙසේවෙතත්, සමගි ජන බලවේගයේ පාර්ලිමේන්තු මන්ත්‍රී සහ රාජ්‍ය මුදල් පිළිබඳ කාරක සභාවේ (COPF) සභාපති හර්ෂ ද සිල්වා මහතා සිය X ගිණුමේ සටහනක් තබමින් සඳහන් කළේ හිටපු ජ්‍යෙෂ්ඨ බහුපාර්ශ්වික නියෝජිතායතන වෘත්තිකයකු මෙම කාර්යයට ගැළපෙනු ඇති බවයි.
ඔහුට අනුව අයවැය නිලධාරියා වසර පහක කොන්ත්‍රාත්තුවක් මත බඳවා ගනු ලබනවා.
එම තනතුර සඳහා සුදුසුකම් ඇති දක්ෂ, අවංක, උසස් සදාචාරාත්මක බව සහ හොඳ නමක් ඇති ශ්‍රී ලංකාවේ පුරවැසියන්ගෙන් අයදුම්පත් කැඳවනු ලබන බව සඳහන්.
මෙම පනත යටතේ නියෝජ්‍ය අයවැය නිලධාරි තනතුරක් ද නිර්මාණය වනු ඇති.
ආණ්ඩුක්‍රම ව්‍යවස්ථාව යටතේ රාජ්‍ය මූල්‍ය වගකීම් ඉටු කිරීමේදී ව්‍යවස්ථාදායකයට සහාය වීමේ අරමුණින් පාර්ලිමේන්තු අයවැය කාර්යාලය පිහිටුවා තිබෙනවා.
පාර්ලිමේන්තු අයවැය කාර්යාලය ස්වාධීන, පක්ෂග්‍රාහී නොවන සහ ඕනෑම දේශපාලන බලපෑමකින් බැහැර සහ ආරක්ෂා විය යුතුයි.
