දිවයිනේ කීර්තිගෙන් ආයෙත් අතේ පැළවෙන පචයක්

අත්ලාන්තික් සාගරයේදී අතුරුදන් වූ සබ්මැරීනයේ නියමුවා ලෙස ක්‍රියාකර ඇත්තේ සබ්මැරීන් නියමුවකු නොව වීඩියෝ ක්‍රීඩා මෙහෙයවන්නෙකු බව ඇමරිකානු සී.බී.එස් පුවත් සේවය වාර්තා කළ බව දිවයින පුවත්පත වාර්තා කර සිටිනවා.

කෙසේ නමුත් සී.බී.එස් පුවත් වාර්තාවේ එවැන්නක් සඳහන් නොවීම විශේෂයක්.

එම සී.බී.එස් පුවත් වාර්තාවට අනුව පැවසෙන්නේ ටයිටැනික් සුන්බුන් නැරඹීමට ගිය Titan නමින් හැඳින්වෙන මෙම සබ්මැරීනය පාලනය කරනු ලබන්නේ වීඩියෝ ක්‍රීඩා පාලකයකට (video game controller) සමාන උපාංගයක් මගින් බව අදාල සමාගමේ ප්‍රධාන විධායක නිලධාරියා පැවසූ බවයි. එවැනි උපාංග මගින් පාලනය වන ගුවන් යානා සහ සමුද්‍රීය යාත්‍රා කිහිපයක්ම ඇති බව University of the West of England හි අභ්‍යවකාශ ඉංජිනේරු විද්‍යාව පිළිබඳ සහකාර මහාචාර්ය ස්ටීව් රයිට් පවසනවා.

එමෙන්ම, මෙම කුඩා සබ්මැරීනය පාලනය කර ඇත්තේ එය නිර්මාණය කළ OceanGate සමාගමේ රධාන විධායක නිලධාරියා වන Stockton Rush විසින් බවත් විදෙස් මාධ්‍ය වාර්තා කරනවා.

දිවයින පුවත්පතට මෙම පුවත වාර්තා කළ කීර්ති වර්ණකුලසූරිය විසින් විදෙස් පුවත් ඉතාමත් වැරදි සහගත ලෙසට පරිවර්තනය කළ පළමු අවස්ථාව මෙය නොවේ. මීට පෙර අවස්ථා ගණනාවකදීම ඔහු මෙවැනි සාවද්‍ය පුවත් වාර්තා කර ඇති අතරම දිවයින පුවත්පත දිගින් දිගටම ඔහුගේ පුවත් පළ කිරීමත් දිවයිනේ මාධ්‍ය භාවිතය සම්බන්ධව ගැටළු ඇති කරන්නක් බවයි විද්වතුන් පෙන්වා දෙන්නේ.

මෙම පුවත මුද්‍රිත පුවත්පතේ ඇති නමුත් සිය වෙබ් අඩවියෙන් එය ඉවත් කරගැනීමට දිවයින මේ වන විට කටයුතු කර තිබෙනවා.