කොවිඩ් එන්නත ලබා දීමේ දී විශ්වවිද්‍යාල සිසුන්ට හා ආචාර්යවරුන්ට ද ප්‍රමුඛතාව දෙන ලෙස විශ්වවිද්‍යාල පරිපාලන අංශ විසින් කොවිඩ් පාලන රාජ්‍ය අමාත්‍යාංශයට යෝජනා කර ඇත.
සියලුම විශ්වවිද්‍යාල ප්‍රජාව සිටින්නේ ලක්ෂයකට මඳක් වැඩි ප්‍රමාණයක් හෙයින් කොවිඩ් එන්නත ලබා දීමේ දී ඔවුන් ප්‍රමුඛ කොට සැලකීමේ ගැටලුවක් මතු නොවන බව මේ සම්බන්ධයෙන් අදහස් දැක්වූ උපකුලපතිවරුන් පවසා සිටියි.
මාර්ගගත ක්‍රමයට විශ්වවිද්‍යාල අධ්‍යයන කටයුතු පවත්වාගෙන ගිය ද ප්‍රායෝගික පරීක්ෂණ සඳහා සිසුන් විශ්වවිද්‍යාලවලට කැඳවීම අනිවාර්ය වන බවත් සියලු සිසුන්ට එන්නත ලබා දීමට හැකි වන්නේ නම් කිසිදු චකිතයකින් තොරව අධ්‍යයන කටයුතු ආරම්භ කිරීමට හැකි වන බවත් එම උපකුලපතිවරුන් ප්‍රකාශ කරයි.
විශ්වවිද්‍යාල සඳහා දිවයිනේ සියලුම ප්‍රදේශවලින් සිසුන් රැස් වන හෙයින් වයිරසය බෝවීම වැළැක්වීමේ ක්‍රියාමාර්ගයකින් තොරව ඔවුන් කැඳවිය නොහැකි වන බවත් එවැනි ක්‍රියාමාර්ගයක් නොගන්නේ නම් සියලු සිසුන් වෙනුවෙන් විශ්වවිද්‍යාල ආරම්භ කිරීමට තවත් කාලයක් ගත වනු ඇති බවත් ඔවුහු ප්‍රකාශ කරයි.
