රනිල් වික්‍රමසිංහ රජයේ පිරිවෙන් අධ්‍යාපන සදහා වෙනම රාජ්‍ය අමාත්‍යවරයෙකු පත්කර තිබෙනවා.
ඒ අනුව ශ්‍රී ලංකා පොදුජන පෙරමුණේ මොණරාගල දිස්ත්‍රික් පාර්ලිමේන්තු මන්ත්‍රී විජිත බේරුගොඩ මහතා පිරිවෙන් අධ්‍යාපන රාජ්‍ය අමාත්‍යවරයා ලෙස ජනාධිපති රනිල් වික්‍රමසිංහ මහතා අතින් අද (08) පත්වීම ලබා ගත්තා.
මීට අමතරව මුදල් රාජ්‍ය අමාත්‍යවරු දෙදෙනෙක් පත්කිරීමට ජනාධිපති රනිල් වික්‍රමසිංහ මහතා කටයුතු කර තිබෙනවා.
ඒ අනුව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී රංජිත් සියඹලාපිටිය මහතා සහ ශ්‍රී ලංකා පොදුජන පෙරමුණේ අනුරාධපුර දිස්ත්‍රික් පාර්ලිමේන්තු මන්ත්‍රී ශෙහාන් සේමසිංහ මහතා නව මුදල් රාජ්‍ය අමාත්‍යවරුන් ලෙස පත් කෙරුණා.
මේ අතර ක්‍රීඩා හා යෞවන කටයුතු රාජ්‍ය අමාත්‍යවරයා ලෙස ශ්‍රී ලංකා පොදුජන පෙරමුණේ මාතලේ දිස්ත්‍රික් පාර්ලිමේන්තු මන්ත්‍රී රෝහණ දිසානායක මහතා පත්කර ඇති අතර ඒ මහතා 64 වන වියේ පසුවීම විශේෂත්වයක්.
එමෙන්ම ජන අරගලයෙන් පසුව ප්‍රථම වතාවට රාජපක්ෂවරයෙකු හට යළිත් අමාත්‍ය ධූරයක් ලබාදීමට රනිල් වික්‍රමසිංහ ජනාධිපතිවරයා කටයුතු කර තිබෙනවා.
ඒ අනුව චමල් රාජපක්ෂ මහතාගේ පුත් ශෂීන්ද්‍ර රාජපක්ෂ මහතා හට වාරිමාර්ග රාජ්‍ය අමාත්‍ය ධූරය ලබාදීමට අද දිනයේ වික්‍රමසිංහ මහතා කටයුතු කළා.
අද දිනයේ රාජ්‍ය අමාත්‍යවරුන් 37 ක් වැනි විශාල පිරිසක් දිවුරුම් දුන්නේ මෙරට රාජ්‍ය සේවය ශ්‍රී ලංකා ආර්ථිකට දැඩි බරක් ලෙසට ජනාධිපතිවරයා සහ ඔහුගේ කැබිනට් මණ්ඩලය අවස්ථා කිහිපයකදීම විවේචනය කර තිබෙන පසුබිමකයි.
